АҚШда коронавирусга чалинганлар сони 4 млн кишидан ошди

Жонс Ҳопкинс университети маълумотларига кўра, коронавирус қайд этилган АҚШ аҳолиси сони 4 миллион кишидан ошди.

АҚШда COVID-19 пандемияси даврида умумий ҳисобда 4 034 102 кишида вирус аниқланган. Мамлакат бу кўрсаткич бўйича дунёда ҳали ҳам биринчи ўринда. Ундан кейинги ўринларни Бразилия (2,2 миллион киши), Ҳиндистон (1,3 миллион киши), Россия (795 минг киши), ЖАР (408 минг киши) эгаллаган. Дунё бўйича эса коронавирус билан 15,4 миллион киши касалланган.

Шунингдек, АҚШда инфекция аниқланганларнинг 144 242 нафари вафот этган. Ўлим ҳолатларининг энг кўпи Нью-Йорк (35,5 минг киши), Нью-Жерси (15,7 минг киши) ва Массачусец (8,4 минг киши) штатида қайд этилган.

АҚШ коронавирус қурбонлари сони бўйича ҳам дунёда биринчи ўринда. Ундан кейин Бразилия  (84 минг киши), Британия (45,6 минг киши), Мексика (41,9 минг киши) ва Италияда (35 минг киши) ўлимлар сони юқори. Умумий ҳисобда эса пандемия даврида коронавирусга чалинган 632,1 минг киши вафот этди.

Эслатиб ўтамиз, АҚШда коронавирусга чалинганлар сони май ойида 1 миллион кишидан, 11 июнда 2 миллион кишидан, 10 июлда 3 миллион кишидан ошганди.