Ўзбекистон Ҳарбий судида давлатга хоинликда айбланган А.Ярбабаев ва Е.Ярбабаевага суд ҳукми ўқилди. Бу ҳақда Олий суд матбуот хизмати хабар берди.
Хабарга кўра, 15 июль куни Ҳарбий судда Жиноят кодексининг 157-моддаси (Давлатга хоинлик қилиш) 1-қисмида назарда тутилган жиноятни содир этганликда айбланган ушбу фуқароларга оид жиноят ишини кўриб чиқиш якунланган.
Бир неча ой давом этган ёпиқ суд мажлисида гувоҳлар ва судланувчиларнинг кўрсатувлари тингланиб, таҳлил қилинди. Тергов органи томонидан тўпланган далилларга баҳо берилиб, судланувчиларнинг келтирган важлари текширилди. Суд якунига кўра, судланувчи А.Ярбабаев ва Е.Ярбабаева юқоридаги жиноятни содир этганликда айбли деб топилди.
Натижада содир этилган жиноятнинг хусусияти ва ижтимоий хавфлилик даражаси, судланувчиларнинг шахси, оилавий аҳволи каби жазони енгиллаштирувчи ва оғирлаштирувчи ҳолатлар эътиборга олиниб, А.Ярбабаевга 11 йил 6 ой муддатга озодликдан маҳрум қилиш жазоси тайинланди.
Шу иш бўйича судланган Е.Ярбабаевага эса Жиноят кодексининг 57-моддаси қўлланиб, 6 йил муддатга озодликдан маҳрум қилиш жазоси тайинланди. Бироқ унинг тергов ва судда жиноятларни фош этишга фаол ёрдам берганлиги ва ишдаги бошқа жавобгарлигини енгиллаштирувчи ҳолатларни эътиборга олиб, суд тайинланган жазони ўтамасдан туриб ҳам унинг хулқини назорат қилиш орқали тузатиш мумкин, деган қатъий фикрга келди ва 3 йил синов муддати белгиланган ҳолда шартли равишда жазодан озод этилди.
Олий суд матбуот хизмати хабарида судланувчиларнинг ёши, қаерда ишлагани ва бир-бирига қариндошлик даражаси очиқланмаган.
Repost’нинг ёзишича, А.Ярбабаев ва Е.Ярбабаева турмуш ўртоқ бўлиб, А.Ярбабаев аввалроқ Ўзбекистон Қуролли Кучлари бош штаби бўлимини бошқарган. Эр-хотин 2019 йилнинг июль ойида ҳибсга олинган. ОАВ хабарларига кўра, улар Россия фойдасига жосуслик қилишда айбланган.
Эслатиб ўтамиз, Россия фойдасига жосуслик қилганликда айбланган ўзбекистонлик сиёсатшунос Рафик Сайфулин 2020 йил 25 май куни 12 йилга озодликдан маҳрум қилинганди. Рафик Сайфулин давлат сирлари ва таҳлилий материалларни Россия томонига етказганликда айбланган.
2020 йил февраль ойида эса Мудофаа вазирлигига қарашли «Ватанпарвар» газетасининг собиқ мухбири Владимир Калошин давлатга хиёнатда айбланиб, 12 йилга қамоқ жазосига ҳукм қилинганди. 2020 йилнинг январида эса давлатга қарши хиёнат бўйича айбланган ТИВнинг собиқ ходими Қодир Юсуповга суд ҳукми эълон қилинганди.
Изоҳ (0)