Литвада коронавирусга чалинган ўзбекистонликлар ҳаммага касаллик юқтириш билан таҳдид қилди

Литванинг Канаус шаҳридаги Hegelmann Transporte логистика компаниясида 19 кишининг коронавирусга чалингани тасдиқланди. lrytas.lt порталининг ёзишича, уларнинг барчаси Ўзбекистон фуқароларидир.

Қайд этилишича, касаллик аниқланган ва айни пайтда Абромишкес реабилитация касалхонасида изоляцияда бўлган ўзбекистонликлар халқаро транспорт компаниясига июль ойининг бошларида ишлашга келган. Компаниянинг яна ўнлаб ишчилари ҳали ҳам тест жавобларини кутмоқда.

lrytas.lt портали маълумотларига кўра, изоляцияда бўлган ўзбекистонликлардан бири компаниянинг бошқа ходимлари билан бир қаторда ҳеч қандай тиббий ёрдам олмаётганидан ғазабланган ва агар шундай давом этса, у кўчага чиқиб атрофидагиларга касалликни юқтириш билан таҳдид қилган.

«Агар тест мусбат чиққан бўлса, бизга тиббий ёрдам олишга имконият беринг. Бу ерда дорилар йўқ, бошқа нарсалар ҳам. Акс ҳолда биз шаҳарга чиқиб, ҳаммани касаллашни бошлаймиз. Бундан ким ютади?», — деган ўзини таништиришни истамаган компания ходимларидан бири.

Таъкидлаш жоизки, Литва Жиноят кодексида қасддан касаллаганлар учун жавобгарлик белгиланган.

Коронавирусга чалинган яна бир ўзбекистонликнинг айтишича, нодонлик қилинмоқда. Чунки компания ходимларининг бирортаси ўзининг тест натижасини кўрмаган, бунгача ким касал, ким касалмаслигини билмаган ҳам.

«Кеча барчамизни реабилитация марказига олиб келишди. Касалланганлигимизни айтишди. Биз тўғри ишдан келгандик, бизни бу ерга шунчаки ташлаб кетишди. Ҳаммаси очиқ, нима хоҳласанг, шуни қиласан. Тест жавобларини ҳам олганимиз йўқ, касалланганимизни фақат улар билишади. Бу ерда шифокорлар йўқ, қандайдир ҳамшира бор холос. Биз келган вақтда овқат беришди, лекин ўзимиз ҳеч нарса олиб келолмасдик. Ким биринчи касалланганини ҳам ҳеч ким билмайди», — деган ўзбекистонлик лрйтас.лт порталига.

Ушбу айбловларга нисбатан Абромишкес реабилитация маркази директори Виталиюс Гламба муносабат билдирар экан «Улар Литва давлатига ғамхўрлик қилгани ва барча зарур ёрдамни кўрсатганлари учун миннатдорчилик билдиришлари керак» деб айтган. Унинг айтишича, ушбу тиббий муассасада коронавирус билан даволанган литваликларнинг бирортаси ҳам яшаш шароитлари ёки овқатланиш борасида ҳеч қандай шикоят билдирмаган.

«Литовский курьер» нашрининг ёзишича, мамлакат бош вазири Саулюс Сквернялис ҳам ўзбекистонликларнинг бундай хатти-ҳаракатига муносабат билдирган.

«Бир нарсани аниқ таъкидлашни истардим. Биз ОАВларда хабар берилаётган таҳдидларга тоқат қилмаймиз. «Шаҳарга чиқиб ҳаммани касаллайман» ва шу каби гаплар ва ҳаракатларга нисбатан кескин жавоб қайтарамиз. Бундай шахсларнинг визалари бекор қилиниб, ўзлари мамлакатдан депортация қилинади», — деган у. Бош вазирнинг айтишича, ҳолат юзасидан полиция тергов ишларини олиб бормоқда.

Сўнгги маълумотларга кўра, Литвада коронавирусга чалинганлар сони 1902 кишини ташкил қилмоқда. Уларнинг 79 нафари вафот этган.