Тиббиёт ходимларининг касбий малакасини ривожлантириш маркази директори Ҳабибулла Оқилов 15 июль кунги Президент видеоселекторидан кейин берган интервьюсида Тошкент шаҳри ва Тошкент вилоятида тайёрланган захира койка-ўринлар етмаётганини маълум қилди, деб хабар беради «Kun.uz».
Ҳабибулла Оқилов йиғилишда давлат раҳбари томонидан белгилаб берилган вазифаларга тўхталиб ўтган.
Халқимизнинг норозилигига сабаб бўлаётган муаммоларнинг биринчиси – 103. «Қўнғироққа жавоб беришмайди», «Узоқ кутиб қоляпмиз», «Касал бўлсак, олиб боргани жой йўқ» каби эътирозлар тез-тез учраб турибди. Мана шу масала бўйича топшириқлар бўлди: Call-марказдаги мутахассислар, линиялар сони кўпайтирилади.Санитария-эпидемиологик осойишталик агентлиги директори Баҳодир Юсуфалиевнинг сўзларига кўра, йиғилишда эпидемик суриштирувларни олиб боришни танқидий кўриб чиқиш масаласи ҳам кўтарилган.Иккинчи муаммо – тез ёрдам машиналари муаммоси эди. Машиналар олинган, лекин мана бу вазиятда улар ҳам етмаяпти. Шунинг учун бугуннинг ўзида тез ёрдам учун 50 та машина Тошкентга, яна 32 та машина амбулатор тизим хизматига берилади.
ПЗР аппаратлари ва таҳлиллар сони етишмаслиги. Республика миқёсида ҳар куни 22 мингдан 24 минггача анализ ўтказиляпти. Лекин бу кам. Анализлар жавоб беш кунгача чиқмагандан кейин, таҳлил топширган фуқаро ўзи бемор ё бемор эмаслигини ҳам билмайди, лекин халқ ичида юрибди.
Мана бугун, ҳозирнинг ўзида масаласи ҳал бўляпти. Топшириқлар аниқ қўйилди – ПЗР аппаратлари сони кўпайтирилади, уларни ишлатиш учун шароит яратилади, мутахассислар тайёрланади. Ҳамма муаммоларни ҳал этиш бўйича аниқ-аниқ топшириқлар олинди.
Яна битта энг катта муаммо: Тошкент шаҳри ва Тошкент вилоятида тайёрланган захира койка-ўринлар етмаяпти. Ҳозир бошқа профилдаги клиникаларнинг профилини ўзгартириб, у ерларга ҳам беморларни ётқизишга мажбур бўляпмиз. Яна керакли миқдорда койка ўринлар тайёрлаш бўйича аниқ топшириқлар берилди.
Ҳабибулла Оқилов, Тиббиёт ходимларининг касбий малакасини ривожлантириш маркази директори
«Ҳар битта ҳолат бўйича эпидемик суриштирувларни охирига етказиш ва занжирни тўлиқ аниқлаш вазифаси қўйилди», – дейди Юсуфалиев.
Бош санитар врачнинг сўзларига кўра, керак бўлса ҳар битта туманда лабораториялар ташкил этиш, бунинг учун ПЗР аппаратлари харид қилиш ва айниқса касаллик ўчоқларида дезинфекция тадбирларини кучайтириш бўйича вазифалар ҳам белгилаб берилган.
Эслатиб ўтамиз, 8 июль куни Коронавирусга қарши кураш штаби вакиллари иштирокида ўтказилган брифинг давомида профессор Ҳабибулла Оқилов коронавирус инфекцияси белгисиз ўтаётган беморларнинг уй ва меҳмонхонада даволанишига рухсат берилган бўлса-да, Ўзбекистондаги стационарларда кўйка-ўринлар қолмаганини маълум қилганди. Бироқ 9 июль куни брифингда Оқилов пандемиянинг дастлабки кунларидан ҳукумат ўз вазифасини бажариб келаётгани, койка-ўринлар, дори воситалари захираси мавжудлигини билдирган.
Президент Шавкат Мирзиёев 14 июль куни бўлиб ўтган видеоселектор йиғилишида мамлакатдаги эпидемиологик вазиятга яна бир бор алоҳида тўхталиб, мамлакатда коронавирусга қарши кураш учун барча захира ва имкониятлар мавжудлигини маълум қилганди.
Изоҳ (0)