«Пандемияга қарши курашда кечаги стратегия бугунги кун талабига жавоб бермайди» — бош вазир ўринбосари Беҳзод Мусаев

Ўзбекистонда, айниқса Тошкент шаҳри ва Тошкент вилоятида коронавирусга қарши курашиш бўйича кечаги тактика, кечаги стратегия бугунги кун талабига умуман жавоб бермайди. Бу ҳақда бош вазир ўринбосари Беҳзод Мусаев 15 июль куни Президент видеоселекторидан сўнг берган интервьюсида маълум қилди, деб хабар беради «Kun.uz».

«Аввал вирусни аниқлаб, ундан сўнг даволашга ўтган бўлсак, ҳозирги ҳолат зудлик билан ёрдам бериш кераклигини кўрсатмоқда», — дейди Мусаев.

Ҳукумат вакилининг сўзлари кўра, Тошкент шаҳрида 135 та тез тиббий ёрдам машинаси бўлиб, биринчи босқичда зудлик билан яна 50 та машина икки кун ичида жиҳозланиб, йўлга қўйилади. Пойтахтдаги Call-марказда фаолият кўрсатаётган ходимлар сони 40 нафардан 100 кишига етказилади.

«Бугун Тошкент шаҳридаги поликлиникаларга 750 та мобил телефон етказиб берилди. Шифокорлар кун давомида уч маҳал ўзини-ўзи даволаш билан шуғулланаётган беморлардан қўнғироқ қилиб ҳол-аҳвол сўрайди ҳамда керакли маслаҳатларни беради», — деди бош вазирнинг ижтимоий ривожлантириш масалалари бўйича ўринбосари.

У бугунги муаммо нафақат соғлиқни сақлаш тизимининг, балки барча даражадаги ҳокимларнинг ҳам муаммоси эканини қайд этиб ўтган.

Беҳзод Мусаевнинг таъкидлашича, ҳудуддаги секторларнинг тўрт раҳбари беморлар ҳолатидан хабардор бўлиши шартлиги белгиланган. Бу орқали улар аҳолининг дард ва муаммолари ҳамда ҳудуддаги соғлиқни сақлаш тизими ҳолатини яқиндан билади.

Бош вазир ўринбосари, шунингдек, пандемия билан боғлиқ вазият муҳокамасига бағишланган видеоселектор йиғилишида дори-дармон ва ҳимоя воситалари захирасини шакллантириш вазифаси қўйилганини ҳам таъкидлаб ўтган.

Аввалроқ Президент коронавирусга қарши курашни самарали ташкил қилмагани учун Жаҳонгир Ортиқхўжаев ва Алишер Шодмоновга ҳайфсан бергани маълум қилинганди.