15 июль куни тахминан соат 10:30 лар атрофида Навоий ИЭСга қарашли сув ўтқазиш тўғони олдида жойлашган сув ўтқазиш жойининг оқиб ўтувчи Зарафшон дарёси қисмидан тахминан 40-45 ёшлардаги номаълум эркакнинг мурдаси топилди. Бу ҳақда Навоий вилояти ИИБ ахборот хизмати хабар берди.
Мазкур ҳолат юзасидан олиб борилган терговга қадар текширув ҳаракатлари давомида ушбу номаълум шахснинг мурдаси 1975 йилда туғилган Самарқанд вилояти Пахтачи тумани Дабусия маҳалласида яшовчи Т.Й.га тегишли эканлиги аниқланган.
Маълумотларга кўра, 12 июль куни соат тахминан 20:00 ларда Кармана тумани яшовчи шахс қайни укаси ҳамда қизи билан биргаликда олдиндан жиноий тил бириктириб, Т.Й. билан ўрталарида ўзаро келишмовчилик натижасида жанжал чиқарган.
Шундан сўнг, улар Т.Й.ни ёғоч бўлаги билан уриб, тан жароҳати етказган. Жиноят иштирокчиларидан бири Т.Й.нинг бўйин қисмидан оёғи билан босиб, уни ҳушсиз ҳолатга келтирган. Соат 01:00 ларда унинг ўлгани маълум бўлгач, жасад эшак аравага ортилиб, Зарафшон дарёсига оқизиб юборилган.
Вилоят прокуратураси, ички ишлар бошқармаси жиноят қидирув ходимларининг тезкор ҳаракатлари натижасида гумонланувчилар қўлга олинган.
Изоҳ (0)