Қарши туманида пахта етиштириш кластери билан шуғулланувчи Sulton Тех Group хусусий корхонаси бош вазирнинг аграр ва озиқ-овқат соҳаларини ривожлантириш масалалари бўйича ўринбосари – Пахта-тўқимачилик кластерлари фаолияти ва салоҳиятини баҳолаш бўйича Республика Ишчи гуруҳи раҳбари Ўктам Барноев, Қишлоқ хўжалиги вазири Жамшид Хўжаев ва унинг биринчи ўринбосари Шуҳрат Тешаевни судга берди. Бу ҳақда «Kun.uz» хабар бермоқда.
Қайд этилишича, улар Вазирлар Маҳкамасида 2020 йил 8 апрелда ўтказилган йиғилишга Sulton Тех Group хусусий корхонасининг қонуний манфаатларини бузадиган асослантирилмаган маълумот тақдим этган. Йиғилиш баёнида корхонага бириктирилган пахта тозалаш заводининг бино ва иншоотларини қайтариш, корхонасининг пахта тўқимачилик кластери фаолиятни тўхтатиш ва ўрнида фермер хўжаликлари кооперацияси ташкил этиш тўғрисида қарор қилинган.
Шу сабабли Sulton Тех Group хусусий корхонаси корхонанинг қонуний манфаатларини бузадиган ҳаракатларини қонунга хилоф деб топиш ҳақида Қибрай туман маъмурий судига шикоят аризаси киритган.
Ушбу маълумотларни Қибрай туман маъмурий суди масъуллари тасдиқлаган. Дастлабки суд мажлиси шу йилнинг 9 июль куни Қибрай туман маъмурий судида бўлиб ўтган. Суд мажлиси жавобгарларнинг ҳеч бири судда иштирок этмагани сабабли 2020 йилнинг 16 июль куни соат 11:00 га қолдирилган.
Эслатиб ўтамиз, Sulton Тех Group хусусий корхонаси ва Қарши туман ҳокимлиги ўртасидаги низо ҳамон давом этмоқда. Қарши туман маъмурий суди Қарши туман ҳокими ва ҳокимлик мансабдор шахсларига Sulton Тех Group хусусий корхонаси кластер фаолиятига аралашиш, унинг 2020 йил учун фермерлар билан тузган шартномасини бекор қилиш ёки ўзгартиришга уриниши тақиқлаб қўйилган.
Ҳозирда суднинг мазкур ҳал қилув қарорига нисбатан Қарши туман прокурори томонидан протест киритилгани ва иш Қашқадарё вилоят маъмурий суди апелляция инстанциясида кўриб чиқилаётгани айтилмоқда.
Изоҳ (0)