Ўзбекистон Ёшлар иттифоқи марказий кенгаши биноси карантинга ёпилди, дея хабар берди «Kun.uz».
Марказий кенгашда ишловчи ўнга яқин ходимларда коронавирус билан зарарланиш ҳолати қайд этилган.
«Кеча бу ҳақда хабарлар тарқалгандан кейин биномиз карантинга тўлиқ ёпилди. Афсуски, касаллик билан зарарланиш ҳолати жуда кўпайиб бормоқда. Мен билганларим ўнга яқин ходимлар», — деди исми сир қолиши шарти билан гапирган манба.
Мавзуга доир: Халқ банкининг 3 та филиалида жами 10 нафар ходимда коронавирус инфекцияси аниқлангани маълум қилинди
«Коронавирусга тест топширган ва расман тасдиқланган ходимлар икки нафар. Буни уларнинг ўзи ҳам тасдиқлади. Қолган ҳолатлар расман тасдиқланмаса, бирор нима деёлмайман. Шу нарса аниқ бўлмай туриб, касалланганлар кўп дейишим хато бўлади.
Аслида Ёшлар иттифоқи марказий кенгаши 10 июлдан бошлаб онлайн тарзда ишлашга ўтганди. Фақат саноқли ходимлар зарурат туфайли келиб ишлаётганди. Хабарлар тасдиқлангач кечадан бошлаб ташкилот биноси карантинга тўлиқ ёпилди», — деди Абдуқодиров.
Матбуот хизмати раҳбарининг қўшимча қилишича, вирус билан зарарланган ходимлардан бири ташкилот биносига келиб, яна бири эса онлайн тарзда ишлаётган бўлган.
Шунингдек, янги ташкил қилинган Ёшлар ишлари агентлиги раиси ўринбосари Дилноза Каттахонова Instagram саҳифаси орқали ўзида COVID-19 аломатлари сезилаётганини маълум қилди.
«Бугун ўзимда ва яқинларимда унинг аломатларини кузатяпман, танишларим ҳам касалланди. Кўча-кўйда карантин қоидаларига бепарво одамлар ҳали ҳам кўп эканини кўриб, хавотирга тушдим.
Энг ёмони кўпчиликда касаллик аломатларсиз кечяпти. Илтимос, ўзингизни ва яқинларингизни асранг, ниқобсиз юрманг, ижтимоий масофа сақланг. Карантин қоидаларига риоя қилинг», — деб ёзди Каттахонова.
Изоҳ (0)