Тошкент вилояти Зангиота туманида коронавирус билан касалланган беморларни даволаш учун махсус қурилган касалхона очилганига бир ҳафта бўлмасдан беморларга тўлиб бўлди. Бу ҳақда Коронавирусга қарши кураш штаби аъзоси Ҳабибулла Оқилов 14 июль, сешанба куни бўлиб ўтган брифингда маълум қилди.
АОКАда бўлиб ўтган матбуот анжуманида Ҳабибулла Оқилов Ўзбекистондаги эпидемиологик вазият, коронавирусдан ўлим кўрсаткичининг ўсиб бориши, статистик рақамлар ҳақидаги саволларга жавоб қайтарди.
Ҳабибулла Оқиловнинг маълум қилишича, Тошкент шаҳрида 16 та шифохона коронавирусга чалинган фуқароларни даволаш учун ишламоқда. Шунингдек, Тошкент шаҳридаги яна бешта шифохонада касалликнинг енгил ва ўрта даражаси билан оғриган, яъни қўшимча кислородга муҳтож бўлмаган беморлар даволанмоқда.
Унинг сўзларига кўра, Зангиотадаги махсус клиника очилганига бир ҳафта бўлмасдан беморларга тўлиб бўлди. Агар касаллар сонининг ошиши шу тарзда давом этса, бошқа клиникалар ҳам коронавирусни даволаш учун мослаштирилиши мумкин.
Шунингдек, Ҳабибулла Оқилов Соғлиқни сақлаш вазирлиги ўлим ҳолатларини камайтириб кўрсатмаётганини таъкидлаган.
«Соғлиқни сақлаш вазирлиги ўлим ҳолатларини камайтириб кўрсатаётгани йўқ. Бизга бундан ҳеч қандай наф йўқ. Бироқ вафот этаётганлар орасида коронавирус инфекциясига тест топширган ва таҳлил жавоблари орқали тасдиқланмаган ҳолатлар бўлиши мумкин. Қўлимизда беморда коронавирус ташхиси тасдиқланган факт бўлмаса, уни коронавирусдан вафот этди, дея олмаймиз», — дея таъкидлаган профессор Оқилов.
Аввалроқ Тошкент шаҳридаги Вирусология илмий-тадқиқот институти директори ва Соғлиқни сақлаш вазирлиги бош инфекционисти Эркин Мусабоев шифохоналарнинг коронавирусни даволашга мослаштирилиши сабабли Ўзбекистонда коронавируснинг билвосита қурбонлари сони вируснинг ўзидан вафот этганлардан 10 марта кўплигини айтганди.
Эслатиб ўтамиз, Зангиота туманидаги янги қурилган юқумли касалликлар шифохонаси 2 минг ўринга мўлжалланган, лекин уни 4 минг ўрингача трансформация қилиш имконияти бор. Соғлиқни сақлаш вазирлиги 13 июль куни пойтахтлик икки аёл ва бир эркакнинг мазкур шифохонада коронавирус асоратларидан вафот этганини хабар қилди.
Эътиборга молик томони, профессор Оқилов 8 июль куни қилган чиқишида Ўзбекистон соғлиқни сақлаш тизимидаги ресурслар «поёнига етгани», бўш койка-ўринлар қолмаганини маълум қилган эди. 9 июлдаги брифингда эса Оқилов койка-ўринлар, дори захираси мавжудлигини, тизим ҳар қанча беморни қабул қила олишини таъкидлади.
Профессор Ҳабибулла Оқиловнинг таъкидлашича, агар Ўзбекистонда кунига 1-1,5 мингта касалланиш ҳолати аниқланса, соғлиқни сақлаш тизими қўшни мамлакатларники каби қулайди. Ўзбекистонда 13 июль куни 594 кишида коронавирус аниқланди.
Изоҳ (0)