O‘zbekiston Yoshlar ittifoqi markaziy kengashi binosi karantinga yopildi, deya xabar berdi “Kun.uz”.
Markaziy kengashda ishlovchi o‘nga yaqin xodimlarda koronavirus bilan zararlanish holati qayd etilgan.
“Kecha bu haqda xabarlar tarqalgandan keyin binomiz karantinga to‘liq yopildi. Afsuski, kasallik bilan zararlanish holati juda ko‘payib bormoqda. Men bilganlarim o‘nga yaqin xodimlar”, — dedi ismi sir qolishi sharti bilan gapirgan manba.
Mavzuga doir: Xalq bankining 3 ta filialida jami 10 nafar xodimda koronavirus infeksiyasi aniqlangani ma’lum qilindi
“Koronavirusga test topshirgan va rasman tasdiqlangan xodimlar ikki nafar. Buni ularning o‘zi ham tasdiqladi. Qolgan holatlar rasman tasdiqlanmasa, biror nima deyolmayman. Shu narsa aniq bo‘lmay turib, kasallanganlar ko‘p deyishim xato bo‘ladi.
Aslida Yoshlar ittifoqi markaziy kengashi 10-iyuldan boshlab onlayn tarzda ishlashga o‘tgandi. Faqat sanoqli xodimlar zarurat tufayli kelib ishlayotgandi. Xabarlar tasdiqlangach kechadan boshlab tashkilot binosi karantinga to‘liq yopildi”, — dedi Abduqodirov.
Matbuot xizmati rahbarining qo‘shimcha qilishicha, virus bilan zararlangan xodimlardan biri tashkilot binosiga kelib, yana biri esa onlayn tarzda ishlayotgan bo‘lgan.
Shuningdek, yangi tashkil qilingan Yoshlar ishlari agentligi raisi o‘rinbosari Dilnoza Kattaxonova Instagram sahifasi orqali o‘zida COVID-19 alomatlari sezilayotganini ma’lum qildi.
“Bugun o‘zimda va yaqinlarimda uning alomatlarini kuzatyapman, tanishlarim ham kasallandi. Ko‘cha-ko‘yda karantin qoidalariga beparvo odamlar hali ham ko‘p ekanini ko‘rib, xavotirga tushdim.
Eng yomoni ko‘pchilikda kasallik alomatlarsiz kechyapti. Iltimos, o‘zingizni va yaqinlaringizni asrang, niqobsiz yurmang, ijtimoiy masofa saqlang. Karantin qoidalariga rioya qiling”, — deb yozdi Kattaxonova.
Izoh (0)