Ўзбекистонда коронавирусга қарши кураш штаби аъзоси, тиббиёт фанлари доктори, профессор Анвар Алимов мамлакатда коронавирусга чалинганлар сони қанчага етса, соғлиқни сақлаш тизими инқироз ҳолатига тушиб қолиши, мамлакат имкониятлари қанча касалга хизмат кўрсатишга етиши масаласидаги саволга жавоб берди.
АОКАда 13 июль, душанба куни бўлиб ўтган брифингда профессорга «Ўзбекистонда коронавирусга чалинганлар сони қанчага етса, соғлиқни сақлаш тизими инқироз ҳолатига тушиб қолади? Имкониятларимиз қанча касалларга хизмат кўрсатишга етади?», деган савол берилди.
Тиббиёт фанлари доктори мазкур саволга аниқ жавоб бермади ҳамда коронавирусга қарши курашаётган бошқа давлатларнинг тажрибасини мисол сифатида келтириб, давлат томонидан амалга оширилаётган барча чора-тадбирлар мутахассислар берган таклифларга асосланишини таъкидлади.
«Бу борада дунё ҳамжамиятидаги статистик маълумотларга эътибор қаратиш керак. Жанубий Кореяни оламизми, Хитойни оламизми, бугунги кунда коронавирусга қарши курашаётган давлатларнинг тажрибасини ўрганганимизда, давлат томонидан амалга оширилаётган барча чора-тадбирлар мутахассислар берган таклифларга асосланган. Хусусан, бизда ҳам шундай. Таклиф-тавсияларни давлат комиссияси ҳар томонлама ўрганади. Барча ишларимиз комиссия томонидан қабул қилинган протоколлар ижроси доирасида амалга оширилмоқда. Ҳозир биз бир неча асосий йўналишларда олиб бораётган ишларимиз кейинги босқичдаги ҳолатларнинг олдини олишга қаратилган», — дея жавоб берди Анвар Алимов.
Аввалроқ Республика махсус комиссияси 10 июль ҳолатига кўра, Ўзбекистоннинг мавжуд соғлиқни сақлаш муассасалари қуввати коронавирусга чалинган янги беморларни қабул қилиш учун етарли эмаслиги, «тизимни қайта тиклаш» учун 1 августгача кучайтирилган карантин тартиби қайтадан жорий этилганини маълум қилган эди. Ўша вақтда коронавирусдан даволанаётган беморлар сони расман 3986 нафар эди.
Соғлиқни сақлаш вазири Алишер Шодмоновнинг фикрича, Ўзбекистонда коронавирус ҳали энг юқори чўққисига чиқмаган, Ўзбекистонда коронавирус авж олса, тиббиёт оғир вазиятга тушиб қолиши мумкин.
Профессор Ҳабибулла Оқиловнинг таъкидлашича, агар Ўзбекистонда кунига 1-1,5 мингта касалланиш ҳолати аниқланса, соғлиқни сақлаш тизими қўшни мамлакатларники каби қулайди.
Эътиборга молик томони, профессор Оқилов 8 июль куни қилган чиқишида Ўзбекистон соғлиқни сақлаш тизимидаги ресурслар «поёнига етгани», бўш койка-ўринлар қолмаганини маълум қилган эди. 9 июлдаги брифингда эса Оқилов койка-ўринлар, дори захираси мавжудлигини, тизим ҳар қанча беморни қабул қила олишини таъкидлади.
Шунингдек, Иқтисодий тадқиқотлар ва ислоҳотлар маркази директори Обид Ҳакимов Ўзбекистонда карантин ҳозир кучайтирилмаса, декабргача коронавирусга чалинганлар сони 64 мингга етиши мумкинлигини маълум қилди. Унинг сўзларига кўра, Тошкент шаҳридаги 16 та тиббиёт муассасасида жами 3580 та койка-ўрин коронавирус инфекциясини юқтириб олган беморлар учун ажратилган, бироқ 13 июль соат 17:00 ҳолатига кўра, Ўзбекистонда 5446 нафар бемор коронавирусдан даволанмоқда, уларнинг 4450 нафари Тошкентда рўйхатга олинган.
Изоҳ (0)