АОКА ҳузуридаги штабда 13 июль, душанба куни Тошкент шаҳри Санитария-эпидемиологик осойишталик маркази бош шифокори ўринбосари Бобур Қурбонов иштирокида брифинг бўлиб ўтди.
Аҳоли орасида коронавирус билан касалланганларнинг кескин ошиб кетиши нима билан боғлиқ, деган саволга Қурбонов қуйидагича жавоб берди.
«Хориждаги фуқаролар Ўзбекистон ҳудудига кириб келгач, махсус карантин зоналарига жойлаштирилади, яъни улар қариндошлари, дўстлари ва танишлари билан мулоқот қилмайди. Ўша ерда улардан тест текшируви учун таҳлиллар олинади. Шундан сўнг уларга ташхис қўйилади. Натижалар асосида COVID-19 тасдиқланади.
Аҳоли орасида коронавирусга чалинганларнинг кўпайиб кетаётганига сабаб фуқаролар, асосан ёшлар карантин тадбирларига амал қилмай қўйди. Тиббий ниқобларни нотўғри тақиш (бурунни очиб), масофа сақламаслик, ёшларнинг кечалари маҳаллалар ва кўп қаватли уйлар тагида йиғилиб бирга вақт ўтказишлари — мана шу сабаблар туфайли Тошкент шаҳрида касалланишлар сони кескин кўпаймоқда», — дейди Қурбонов.
Маълумот учун, 8 июлдан буён Ўзбекистонда кунлик касалланганлар сони 400 нафардан ошмоқда. 9—12 июль кунлари Тошкент шаҳрида аниқланган касалланиш ҳолатларининг 599 таси аҳоли орасида ва бор-йўғи 8 таси карантиндагилар орасида қайд этилди. 13 июль куни ҳам Тошкент шаҳрида аниқланган 217 та ҳолатнинг барчаси (соат 10:00 ҳолатига кўра 142 кишида, соат 17:00 ҳолатига кўра 75 кишида) аҳоли орасида аниқланди.
2020 йил 13 июль соат 17:00 ҳолатига кўра, коронавирус инфекцияси қайд этилган беморлар сони 13 360 нафарни ташкил этмоқда. Беморларнинг 7852 нафари (58 фоиз) соғайган. Касаллик оқибатида 62 нафар бемор вафот этган.
Изоҳ (0)