O‘zbekiston sog‘liqni saqlash vaziri Alisher Shodmonovning ma’lum qilishicha, mamlakatda koronavirus avj oladigan bo‘lsa, tibbiyot tizimi og‘ir vaziyatga tushib, boshqa yo‘nalishlarda tibbiy xizmatlarni ko‘rsatish imkonsiz bo‘lib qolishi mumkin. Bu haqda u “O‘zbekiston 24” telekanaliga bergan intervyusida ma’lum qilgan.

Vazirning so‘zlariga ko‘ra, mamlakatda mavjud yuqumli kasalliklar shifoxonalarining barchasi ayni paytda ishlab turibdi. Bundan tashqari, umumiy yo‘nalishdagi shifoxonalarning yo‘nalishini o‘zgartirib, yuqumli kasalliklarni davolashga moslashtirilgan. Bular bilan bir qatorda, shoshilinch yordam xizmati, tug‘ruq, homiladorlarga yordam, ijtimoiy yo‘nalishlarga xizmat ko‘rsatish ham to‘la ta’minlanmoqda.

“Lekin kasallik avj oladigan bo‘lsa, tibbiyot tizimi og‘ir vaziyatga tushib, boshqa yo‘nalishdagi yordamlar to‘xtab qolishi mumkin. Shuning uchun hozir hammamiz teng harakat qilib, kasallik tarqalib ketishining oldini olib, og‘ir bemorlar sonini, shifoxonalarga tushadiganlarni kamaytirishimiz kerak”, — dedi Alisher Shodmonov.

Mavzuga doir: “O‘zbekistonda kuniga 1-1,5 mingta koronavirusga chalinish holati aniqlansa, sog‘liqni saqlash tizimimiz qulaydi” — Habibulla Oqilov

Uning qayd etishicha, hozirgi kunda Toshkent shahrida 14 ta tibbiyot muassasasida koronavirusga chalingan bemorlarga yordam ko‘rsatilmoqda, yana 4 ta shifoxona kasallikka gumoni borlarga xizmat ko‘rsatishga moslashtirilgan. Respublika bo‘yicha har bir viloyatda kamida ikkitadan shifoxona yuqumli kasalliklarni davolashga tayyorlangan.

“Viloyatlardagi shifoxonalar 110 nafargacha bemorga (bu hali ko‘p emas) to‘la yordam berish imkoniyatiga ega. Ammo boshqa mamlakatlarni ko‘rib turibmizki, bemorlarni davolash uchun sport zallari, stadionlar, ta’lim muassasalari, yotoqxonalarda joy qilinmoqda. Ular ixtisoslashmagan, yordam berish imkoniyati, asbob-uskunasi yo‘q. Bemorlar faqat vaqtincha olib kelib yotqizilyapti” , — deya ta’kidladi sog‘liqni saqlash vaziri.

Uning qayd etishicha, O‘zbekistonda bunday holatning oldini olish uchun hozir harakatlarni kuchaytirish, vaziyatni to‘g‘ri tushunib, karantinni qattiq ushlash kerak.

Mavzuga doir: “ O‘zbekiston sog‘liqni saqlash tizimidagi resurslar poyoniga yetdi, desa mubolag‘a bo‘lmaydi. Bo‘sh koyka-o‘rinlar qolmadi” — Habibulla Oqilov

Avvalroq Alisher Shodmonov O‘zbekistonda koronavirus hali eng yuqori cho‘qqisiga chiqmaganini aytgandi.

Eslatib o‘tamiz, O‘zbekistonda koronavirus bilan bog‘liq vaziyatning keskinlashayotgani sababli 10-iyuldan 1-avgustgacha mamlakatda qat’iy karantin choralari joriy qilinadi. 10-iyuldan to‘ylar, oilaviy va ommaviy tadbirlar taqiqlanadi, avtotransport harakati cheklanadi, buyum bozorlari va bolalar bog‘chalari yopiladi, xalqaro aviaqatnovlar ikki baravarga qisqartiriladi, koronavirusdan uy sharoitida davolanayotganlarga tibbiy yordam berish uchun mobil guruhlar tashkil etiladi, O‘zbekistonning barcha hududlari epidemiologik toifasi “qizil” bo‘ladi.

Mavzuga doir: “Biz Maxsus komissiyadan 28 kun so‘ragandik, 20 kunga chidab bersak ham katta gap deyishdi” — Habibulla Oqilov

O‘zbekistonda 2020-yil 8-iyul soat 17:30 holatiga ko‘ra, koronavirus infeksiyasi qayd etilgan bemorlar soni 144 kishiga ko‘payib, 10 982 nafarni tashkil etmoqda. Mamlakatda ayni paytgacha koronavirus infeksiyasiga chalingan 6888 nafar fuqaro sog‘aygan, koronavirusdan vafot etgan bemorlar soni esa 42 nafarga yetdi.