Хоразм вилоятида 2020 йил 10 июлдан 11 июлга ўтар кечаси кучли шамол кузатилган. Натижада 12900 та хонадон беш соатгача электр энергиясиз қолган. Бу ҳақда «Дарё»га журналист Соҳиба Ғойипова хабар берди.
Таъкидланишича, кучли шамолдан зарар кўрган хонадонлар вилоятнинг Ҳазорасп, Янгибозор, Боғот туманларида жойлашган.
Дарахтлар, хонадонлар томининг электр симларига қулаши натижаси Ҳазорасп туманида 4 мингта, Боғот туманида 4 минг 600 та, Янгибозор туманида эса 4 минг 300 та аҳоли хонадони 3-5 соат давомида электр энергиясиз қолган.
Кучли ёмғирга айланган шамол оқибатларини бартараф қилиш ва аҳолига электр энергияси етказиб бериш мақсадида «Хоразм ҳудудий электр тармоқлари» АЖ ишчи ходимлари тун давомида электр тармоқларини қайта улаган.
Қўшимча қилинишича, кучли шамол вилоятнинг учта туманида кузатилган. Бошқа ҳудудларда бу каби кўнгилсизлик рўй бермаган. Айни вақтда вилоятнинг барча ҳудудларида электр энергияси қайта тикланган.
Эслатиб ўтамиз, Хоразм вилоятида 2020 йилнинг 17 май куни ҳам кучли шамол кузатилиб, 15-25 метр/секунд тезлик билан эсган шамол оқибатида корхона, ташкилот ва турар жойларнинг том қисмлари учиб кетган ва пастга қулаганди. Бухоро вилоятида 2020 йилнинг 27 апрель куни содир бўлган табиий офат оқибатида шаҳар ва туманларда 41 минг 927 та бино ва иншоотлар талафот кўрганди.
Изоҳ (0)