Самарқанд вилоятида 10 июль куни коронавирусга чалиниш бўйича 37 та ҳолат аниқланди. Шундан 27 таси Самарқанд шаҳрида қайд этилган. Бу ҳақда вилоят ҳокими Эркинжон Турдимов 10 июль, шанба куни самарқандликларга иккинчи маротаба йўллаган мурожаатида маълум қилди, дея хабар берди «Дарё» мухбири.

«Вазият ёмон томонга қараб кетяпти. Вилоятда 10 июль куни 37 та ҳолат аниқланди. Касалланганларнинг жами сони 573 нафарни ташкил этмоқда. Улардан 475 нафари соғайган. Даволанаётган беморлардан 3 нафарининг аҳволи ўта оғир, 18 нафар бемор оғир аҳволда қолмоқда. 2775 нафар фуқаро карантинда», — деган вилоят ҳокими Эркинжон Турдимов.

Самарқандда бир кун ичида 30 дан ортиқ кишида касаллик аниқланиши илгари ҳеч қачон кузатилмаган. Аммо Соғлиқни сақлаш вазирлиги 10 июль куни Самарқандда 37 эмас, 15 кишида коронавирус аниқлангани ҳақида хабар берганди.

Фото: Telegram / @ssvmatbuotkotibi

Соғлиқни сақлаш вазирлиги маълумотлари бўйича, 10 июль соат 23:30 ҳолатига кўра, Самарқандда 536 кишида касаллик аниқланган, 464 киши коронавирусдан соғайган. Эркинжон Турдимовдаги маълумотлар бўйича вилоятда касалланганлар 37 кишига, соғайганлар эса 11 кишига кўпроқдир.

Вилоят раҳбари Самарқанд шаҳрида бир кунда 27 та ҳолат аниқланганига эътибор қаратаркан, шаҳарда вазият жиддий эканини алоҳида таъкидлади. Шунингдек, Пастдарғом туманида уч нафар, яна қатор туманларда бир нафардан бемор аниқланганини айтиб, барчани вазиятга жиддий қарашга чақирди.

«Республика бўйича эълон қилинган карантинга жиддий қарашингизни сўрайман. Чунки кўрсаткичлар яхши томонга кетмаяпти. Ижтимоий тармоқларда гувоҳ бўляпмиз, одамлар ‘бу йўқ нарса, ўйлаб топилган’, деб карантин қоидаларини қўпол равишда бузишяпти. Мен бекорга уч нафар фуқаронинг ўта оғир аҳволдалигини, 18 киши оғир ҳолатдалигини айтмаяпман, — деди вилоят ҳокими Эркинжон Турдимов. — Бор нарса эканки, шундай кўрсаткичлар кузатиляпти. Ўзимизни, бир-биримизни асрамасак, ўлим ҳолатлари кўпайиши мумкин. Бунинг олдини олишимиз, фуқароларимизни асрашимиз керак. Асосий мақсад шу. Жойларда барча туман ҳокимлари, мутасадди ташкилотлар кам таъминланган оилаларга, ишини йўқотган, қийналган оилаларга озиқ-овқат кўринишида моддий ёрдам кўрсатиб боради».

ССВ бутун республикада аҳволи оғир беморлар сони 43, аҳволи ўта оғир беморлар сони 10 нафарни ташкил этаётганини маълум қилган. Эркинжон Турдимовнинг сўзларидан шу нарса маълум бўляптики, Ўзбекистон бўйича аҳволи оғир беморларнинг 41 фоизи ва аҳволи ўта оғир беморларнинг 30 фоизи ҳозир Самарқандда даволанмоқда.

Вилоят ҳокими, шунингдек, фуқаролардан ўзларида касаллик аломатини сезган заҳоти тиббий муассасаларга мурожаат қилишини сўраган.

«Фуқароларимиз коронавирусга йўлиққандан кейин ўзларича даволаниб, пневмонияга айлангандан сўнг тиббий муассасаларга мурожаат қилмоқда. Иситма пайдо бўлдими, дарҳол тиббий муассасага мурожаат этишингизни сўрайман. Тиббиёт ходимлари, мутахассислар керакли чораларни кўришади. Ўзимни даволайман, тез ўтиб кетади, бу ўткинчи нарса, иккита таблетка ичсам, яхши бўламан, деган нарсадан йироқ бўлинг, дарҳол тиббиёт муассасасига хабар беринг. Агар бирлашсак, коронавирусни енгамиз», — деган Эркинжон Турдимов.

Соғлиқни сақлаш вазирлиги Ўзбекистонда 11 июль соат 10:00 ҳолатига кўра, коронавирусга чалинганлар бўйича янгиланган маълумотларни тақдим этди. Бир кечада коронавирус инфекцияси қайд этилганлар сони 179 кишига кўпайиб, касалланганларнинг умумий сони 12 206 нафарга етди. Янги маълумотларда Самарқандда коронавирус юқтириб олиш билан боғлиқ янги ҳолатлар ҳақида хабар берилмаган. Шунингдек, коронавирусдан тузалган ҳамда аҳволи оғир ва ўта оғир беморлар сонида ҳам ўзгариш бўлмаган.

Эслатиб ўтамиз, Навоийда юз берган илк ўлим ҳолати ҳақида ҳам биринчи бўлиб вилоят ҳокими Қобул Турсунов 7 июль куни маълум қилганди. Кейинроқ Навоий вилояти ҳокимлиги ахборот хизмати беморнинг ёши, жинси ва унга қўйилган ташхис ҳақида маълумот берганди. Ушбу хабарларни кун охирида ССВ тасдиқлаганди.