Ҳабибулла Оқилов: Почта жўнатмалари орқали коронавирус юқтириш хавфи йўқ

Коронавирусга қарши кураш штаби аъзоси Ҳабибулла Оқилов коронавирус инфекцияси қайд этилган мамлакатлардан жўнатмалар олиб туриш хавфсиз эканлигини маълум қилди.

Мутахассис Жаҳон соғлиқни сақлаш ташкилоти савдо-сотиқ ва товарларнинг бошқа мамлакатлардан келтирилиши борасида ҳеч қандай чеклов тавсия этмагани сабабли жўнатмалар орқали вирус юқтириш хавфи йўқлигини билдирган. Почта жўнатмалари доимий тартибда ишламоқда.Вирус юза қисмларда 3 кундан бир неча кунгача сақланиши, муддатлар юза тури, ҳарорати ва атроф-муҳит намлиги каби бир қанча шартларга бориб тақалиши таъкидланди. Шу сабабли ҳам юзалар, эшик тутқичлари, техника ва айниқса, мобил телефонларни дезинфекция қилиш муҳим саналиши, вирусни таркибида хлор ёки спирт мавжуд бўлган дезинфекция воситалари билан кетказиш мумкинлиги яна бир бор ёдга солиб ўтилди.

Эслатиб ўтамиз, Жаҳон соғлиқни сақлаш ташкилоти тавсияларига кўра, тўловларни амалга оширишда нақд пуллардан фойдаланиш вирус тарқалишига олиб келувчи каналлардан бири бўлиши мумкинлиги, вирус қоғоз шаклидаги ташувчиларда 3-4 кун яшаши маълум қилинган эди.