Фарғона вилоятининг Олтиариқ туманида коллежда ўқиганлик тўғрисида сохта диплом тайёрлаб берган мактаб ўқитувчилари қўлга олинди. Бу ҳақда «Дарё»га Бош прокуратура матбуот хизмати хабар берди.
Олтиариқ туманидаги мактаб ўқитувчилари З.З., М.Й. ва Р.Ю.лар олдиндан тил бириктириб, фуқаро М.нинг ишончига кириб, унга тикувчилик йўналиши бўйича Олтиариқ туман агросаноат коллежини тамомлаганлиги ҳақидаги сохта дипломни тайёрлаб бериш эвазига 500 доллар талаб қилган.
Пулни олаётган вақтида Бош прокуратура ҳузуридаги департаментнинг Олтиариқ туман бўлими томонидан ДХХ ходимлари билан ҳамкорликда ўтказилган тезкор тадбирда ашёвий далил билан ушланган.
Шунингдек, тадбир жараёнида фуқаро М.Й.нинг ёнида 2 та тўлдирилмаган дипломлар мавжудлиги аниқланиб ашёвий далил сифатида олинган.
Мазкур ҳолат юзасидан, З.З., Р.Ю. ва М.Й.га нисбатан Жиноят кодексининг 168-моддаси (Фирибгарлик) ва 228-моддаси (Ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)