Россиядаги ўзбекистонликлар Қозоғистон билан чегарани кесиб ўтиш учун Самарага келишда давом этмоқда. Бу ҳақда ўзбеклар ва ўзбекистонликларнинг бутунроссия кенгашининг минтақавий бўлими раҳбари Дилёра Собировага таяниб «Интерфакс» хабар берди.

Кадр: Facebook

Маълум қилинишича, ўзбекистонликларнинг Россия—Қозоғистон чегарасига келишда давом этишига таксичиларнинг Қозоғистон чегараси очилгани ҳақидаги ёлғон маълумоти сабаб бўлмоқда.

«Агар кеча бу ердагиларнинг сони 1139 киши бўлган бўлса, бугун уларнинг сони 1212 кишига етди. Одамлар, асосан, таксида Москва вилояти ва Санкт-Петербургдан етиб келмоқда», — дея таъкидлаган Дилёра Собирова.

Таъкидланишича, Қозоғистон ва Ўзбекистон расмийлари йиғилган одамларни ўтказиш бўйича музокараларни давом эттирмоқда, ҳозирча ҳеч қандай келишувга эришилгани йўқ.

Шунингдек, Оренбург вилоятида ҳам 747 нафар ўзбекистонлик йиғилган.

Аввалроқ Ўзбекистон Ташқи ишлар вазирлиги Россия—Қозоғистон чегарасидаги «Маштаково» ва «Сагарчин» назорат-ўтказиш пунктлари яқинида Ўзбекистон фуқаролари тўплангани ҳақида хабар берганди. Ўзбекистоннинг Россиядаги элчихонаси фуқароларни Қозоғистон билан чегарани кесиб ўтишда турли шахсларга мурожаат қилмасликка чақирди. Элчихона чегарага етиб келаётган ўзбекистонликларнинг кўпчилиги ёлғон хабарларга ишониб, Россиянинг турли ҳудудларидан келгани ва Қозоғистон орқали ватанга қайтиш истагини билдираётганини маълум қилди.

Эслатиб ўтамиз, 2020 йил 13 майда Россия—Қозоғистон чегарасида тўпланган ўзбекистонликлар Шавкат Мирзиёевга мурожаат йўллаган, эртаси куни эса Ўзбекистон ТИВ чегарада тўпланган юзлаб ўзбекистонликлардан Республика махсус комиссияси қарорини кутишини сўраган. Кейинчалик Россиянинг Самара вилоятида Ўзбекистонга қайтиш учун чегараларнинг очилишини кутаётган фуқаролар орасида коронавирус тарқалишининг олдини олиш мақсадида улар учун лагер-обсерватор ташкиллаштирилгани маълум бўлди. 18—19 май кунлари Россия—Қозоғистон давлатлараро чегарасидаги «Маштаково» назорат-ўтказиш пунктида тўпланган 1206 нафар Ўзбекистон фуқароси Қозоғистон ҳудуди орқали ватанга қайтарилган.

25 майда Самарада яна юзлаб ўзбекистонликлар тўпланди ва Ўзбекистон ТИВ вазиятга муносабат билдириб, Россия ҳудудида бўлиб турган Ўзбекистон фуқароларидан Россия—Қозоғистон давлатлараро чегарасини кесиб ўтиш нуқталарига боришга уринмасликни, яшаш жойларида қолишни ва карантин чораларига қатъий амал қилишни сўради. 29 майда вазирлик ўзбекистонликларни Қозоғистон билан чегарани кесиб ўтишда турли шахсларга мурожаат қилмасликка чақирган. Июнь ойининг бошида Россия—Қозоғистон чегарасида тўпланган 350 нафардан ортиқ ўзбекистонлик Қозоғистон ҳудуди орқали мамлакатга олиб келинди.