YouTube’даги каналларнинг бирида Lamborghini Murcielago SV ҳамда Aventador SV фотосессия вақтида бир-бири билан тўқнашгани тасвирланган видео пайдо бўлди.
Кадрларда Huracan пойга машинасининг ортидан секин ҳаракатланаётган Aventador SV ва Murcielago SV’ни кўриш мумкин. Қайсидир онда иккита суперкарнинг бортлари ўзаро тўқнашган.
Бу каби кутилмаган тўқнашувга нима сабаб бўлгани номаълум, балки суперкарлар ҳайдовчилари етарли даражада эътиборли бўлмаган ёки бошқа тарафга қараб ҳаракатланаётган бўлган. Автомобиллар бир-бири билан тўқнашган заҳоти тўхтаган ва атрофдагилар етказилган зарарни баҳолай кетган.
Кўнгилсиз ҳодиса оқибатида Aventador SV’га кўпроқ зарар етган. Унинг олд чап ғилдираги яхшигина тирналган. Шунингдек, олд қанотларига ҳам шикаст етган.
Murcielago SV’нинг эса йўлови ўтирадиган томони бироз тирналган холос. Етказилган зарар у қадар катта бўлмаса-да, уни таъмирлаш анча қимматга тушиши тайин.
Ушбу жуфтлик орасида бироз эскироқ бўлган Murcielago SV моделининг қиймати юқорироқ. Lamborghini компанияси Aventador SV купесидан 600, Aventador SV Roadster’дан 500 нусха ишлаб чиқарган бўлса, Murcielago SV’дан 186 нусха яратилган.
Бу сўнгги вақтларда Lamborghini моделлари билан содир бўлаётган биринчи кўнгилсиз ҳодиса эмас. Хусусан, июнь ойининг ўрталарида Сингапурда иккита бир хил Lamborghini Aventador аварияга учрагани тасвирланган видео тарқалган эди. Кейинроқ эса Рязань кўчаларида иккита бир хил Lamborghini’нинг аварияга учрашига бир баҳя қолганди.
Изоҳ (0)