Британия Антарктика хизмати олимлари Антарктидада 65 йил олдин вафот этган сайёҳ ва тадқиқотчи Дэннис Беллнинг жасадини аниқлади. Уни музлик чекиниши натижасида очилган қоялар орасидан топишган.
25 ёшли Белл 1959 йил 26 июлда Антарктика яримороли қирғоқларига илмий экспедицияга йўл олган. У ҳамкасби Жефф Стокс билан бирга Кинг-Жорж оролида тадқиқот ишларини олиб бораётганда, бир куни муз ва қор орасидаги 30 метрлик ёриққа тушиб кетган. Уни қутқариш учун қилинган барча уринишлар натижасиз қолган.
Фалокатдан кейин 65 йилдан ортиқ вақт давомида Беллнинг жасади бедарак йўқолган деб ҳисобланган. Бироқ 2025 йилнинг январь ойида тадқиқотчилар у ҳалок бўлган Адмираллик кўрфази ҳудудини ўрганишга боришган. Улар қоялар ва музлар орасидан инсон суякларини топишган, сўнгра уларни Фолкленд оролларига, у ердан эса Лондонга жўнатишган.
Мутахассислар ДНК таҳлилини ўтказишган. Генетик материал Беллнинг ака-укаси ва синглиси Девид ва Валерининг намуналари билан таққосланган ва ўхшашликлар аниқланган.
Тадқиқотчининг ака-синглиси бу кашфиётдан “лол қолганликларини” айтишмоқда.
Ҳозирда Австралияда истиқомат қилаётган Девид Беллнинг таъкидлашича, Дэннис кўп қиррали инсон бўлиб, бир сафар радиоприёмникни нолдан йиғган экан. У Англияга қайтиб, акасининг жасадини дафн этишни режалаштирмоқда. Ўша экспедиция пайтида Белл билан бирга бўлган Жефф Стоуксга келсак, у жасад топилишидан бир неча ҳафта олдин вафот этган.
Бундан аввал Покистоннинг тоғли Кўҳистон минтақасида 28 йил олдин бедарак йўқолган эркак жасади эриётган музлик орасидан топилганди.
Изоҳ (0)