Бухоро вилоятининг Олот туманида хавфсизлик камарини тақмай йўл қоидасини бузиб ҳаракатланиб келган Damas ҳайдовчиси бурилиш чироқларини ёқмай бурилгани учун ортидан келаётган иккита Spark’ни таъмирталаб аҳволга солди. Бу ҳақда «Дарё»га вилоят ИИБ ЙҲХБ матбуот хизмати раҳбари Улуғбек Шукруллаев хабар берди.
Таъкидланишича, воқеа 2020 йил 30 июнь куни соат 19:30 да Олот туманидаги «Оқ олтин» маҳалласи ҳудудидан ўтган Олот—Жумабозор автомобиль йўлининг биринчи километрида содир бўлган.
«Халқаро аҳамиятига молик ушбу йўлда Damas ҳайдовчисининг йўл ҳаракати қоидаларига амал қилмагани иккита автомобилнинг таъмирталаб аҳволга келишига сабаб бўлди», — дейди Улуғбек Шукруллаев.
Damas ва икки Spark иштирокидаги ЙТҲда Damas ҳайдовчисининг ўнг оёқ болдир суяги ёрилган ва туман шифохонасига ётқизилган.
Ҳолат юзасидан ҳозирда тергов-суриштирув жараёнлари кетмоқда.
Июнь ойи якунида Damas’лар иштирокидаги ЙТҲлар сони сезиларли даражада ортди. 2020 йилнинг 27 июнь куни Фарғонада иккита Damas тўқнашиши оқибатида Damas’лардан бирининг ҳайдовчиси вафот этган бўлса, Марғилонда Damas пиёдани уриб юбориши оқибатида пиёда вафот этди. Шунингдек, Бухоро вилоятининг Ромитан туманида Damas’нинг эшак аравага урилиши оқибатида 25 ёшли аёл вафот этди.
Изоҳ (0)