YouTube’dagi kanallarning birida Lamborghini Murcielago SV hamda Aventador SV fotosessiya vaqtida bir-biri bilan to‘qnashgani tasvirlangan video paydo bo‘ldi.
Kadrlarda Huracan poyga mashinasining ortidan sekin harakatlanayotgan Aventador SV va Murcielago SV’ni ko‘rish mumkin. Qaysidir onda ikkita superkarning bortlari o‘zaro to‘qnashgan.
Bu kabi kutilmagan to‘qnashuvga nima sabab bo‘lgani noma’lum, balki superkarlar haydovchilari yetarli darajada e’tiborli bo‘lmagan yoki boshqa tarafga qarab harakatlanayotgan bo‘lgan. Avtomobillar bir-biri bilan to‘qnashgan zahoti to‘xtagan va atrofdagilar yetkazilgan zararni baholay ketgan.
Ko‘ngilsiz hodisa oqibatida Aventador SV’ga ko‘proq zarar yetgan. Uning old chap g‘ildiragi yaxshigina tirnalgan. Shuningdek, old qanotlariga ham shikast yetgan.
Murcielago SV’ning esa yo‘lovi o‘tiradigan tomoni biroz tirnalgan xolos. Yetkazilgan zarar u qadar katta bo‘lmasa-da, uni ta’mirlash ancha qimmatga tushishi tayin.
Ushbu juftlik orasida biroz eskiroq bo‘lgan Murcielago SV modelining qiymati yuqoriroq. Lamborghini kompaniyasi Aventador SV kupesidan 600, Aventador SV Roadster’dan 500 nusxa ishlab chiqargan bo‘lsa, Murcielago SV’dan 186 nusxa yaratilgan.
Bu so‘nggi vaqtlarda Lamborghini modellari bilan sodir bo‘layotgan birinchi ko‘ngilsiz hodisa emas. Xususan, iyun oyining o‘rtalarida Singapurda ikkita bir xil Lamborghini Aventador avariyaga uchragani tasvirlangan video tarqalgan edi. Keyinroq esa Ryazan ko‘chalarida ikkita bir xil Lamborghini’ning avariyaga uchrashiga bir bahya qolgandi.
Izoh (0)