Хитойда сўнгги суткада коронавирус билан касалланиш бўйича 4 та янги ҳолат аниқланди. Бу ҳақда Хитой Соғлиқни сақлаш миллий комиссиясининг маълумотига таяниб «ТАСС» хабар берди.
Қайд этилишича, аниқланган 4 та ҳолатнинг 1 таси мамлакатнинг ўзида, Пекин шаҳрида, қолган 3 таси четдан юқтирилган.
Жонс Ҳопкинс маълумотларига кўра, айни пайтда мамлакатда 84 871 киши коронавирусга чалинган, уларнинг 79 720 нафари соғайган, 4641 нафар бемор COVID-19 қурбонига айланган.
Жанубий Кореяда эса сутка давомида 48 киши коронавирусга чалингани қайд этилиб, касалланганларнинг умумий сони 13 137 нафарга етди.
Касалликлар профилактикаси ва назорати маркази (KCDC) маълумотларига кўра, янги касалланиш ҳолатларининг 24 таси мамлакатнинг ўзида, қолган 24 таси четдан юқтирилган.
Сутка давомида 16 киши соғайиб, тузалганларнинг умумий сони 11 848 нафарга етган, касаллик қурбонлари сони эса 284 нафарни ташкил этмоқда.
Мамлакатда коронавирусни аниқлаш бўйича қарийб 1,3 миллионта тест ўтказилган.
KCDC маълумотларига кўра, Жанубий Корея 1 июлдан бошлаб «Ремдесивир» дори воситасини сотиб олишни бошлади. «Ремдесивир» Европа Иттифоқида рухсат олиш учун тавсия қилинган коронавирусга қарши илк дори воситаси ҳисобланади. Бу дори воситаси оғир аҳволдаги беморларни даволашда қўлланилади.
Қайд этилишича, 7 июлга қадар касалхоналар «Ремдесивир» билан бепул таъминланади, 8 июлдан бошлаб эса унинг нархи муҳокама қилинади.
Изоҳ (0)