Бишкек мери Азиз Суракматов қирғизистонлик тадбиркорларга мурожаат қилиб, пойтахтда очилаётган касалхоналар учун кислород концентраторлари ва сунъий нафас олдириш аппаратларини харид қилишда ёрдам сўради, деб хабар беради «24.kg».
Суракматовнинг таъкидлашича, Қирғизистон пойтахтида пневмония билан касалланиш ҳолати авж олгани сабаб вазият мураккаб тус олган. Бишкекдаги касалхоналар беморларга тўлиб кетган, янги касаллар учун жой етмаяпти. Мэрия бир кечада кундузги стационарларни тиклаган — тўрт туманнинг ҳар бирида биттадан. Бу ерда касалликнинг ўрта ва енгил шакли билан оғриган беморлар қабул қилинади.
«Мен кичик ва ўрта бизнес вакилларига, меценат ва бизнесменларга мурожаат қиламан, илтимос, бизга инсонлар ҳаётини сақлаб қолишда керак бўладиган қурилмаларни сотиб олишга ёрдам беринг», — дейди Бишкек мэри.
Сўнгги маълумотларга кўра, Қирғизистонда COVID-19 билан касалланганлар сони 7691 кишига етган, уларнинг 92 нафари вирус қурбонига айланган. Ҳозирга қадар 2843 нафар бемор даволанган.
Аввалроқ Ўзбекистон Қирғизистонга навбатдаги инсонпарварлик ёрдамини юборгани тўғрисида хабар берилганди, бу ҳисоб бўйича мамлакат томонидан Қирғизистонга юборилган учинчи инсонпарварлик ёрдами ҳисобланади.
Изоҳ (0)