Ўзбекистон Президенти Шавкат Мирзиёев 6 июль, душанба куни Қозоғистоннинг биринчи президенти — элбоши Нурсултон Назарбоев билан телефон орқали мулоқот қилди. Бу ҳақда Президент матбуот хизмати хабар берди.
Давлат раҳбари суҳбат аввалида Нурсултон Назарбоевни юбилей билан самимий табриклаб, унга мустаҳкам соғлиқ, бахт-саодат ва янги зафарлар тилади.
Элбошининг замонавий Қозоғистонни барпо этиш, кучли давлат бошқаруви институтлари ва миллий кадрлар тайёрлаш тизимини ривожлантириш, мамлакат рақобатбардошлиги, халқаро нуфузини оширишга ва энг муҳими, аҳолининг юксак турмуш даражасини таъминлашга қаратилган самарали ижтимоий-иқтисодий ислоҳотларни амалга оширишдаги тарихий роли алоҳида қайд этилди.
«Нурсултон Назарбоевнинг муваффақиятли амалга оширилган йирик ташаббусларидан бири — жадал ривожланиб бораётган Қозоғистоннинг ‘ташриф қоғозиъга айланган янги пойтахт Нур-Султон шаҳрига асос солингани таъкидланди», — дейилади хабарда.
Қайд этилишича, элбошининг глобал хавфсизлик ва барқарорликни таъминлаш, турли ҳудудлардаги можароларни тинч йўл билан ҳал этиш, Марказий Осиёда интеграцияни кучайтириш ва барқарор тараққиётга эришиш борасидаги ташаббуслари халқаро ҳамжамиятда кенг эътирофга сазовор бўлди.
Таъкидланишича, Қозоғистоннинг биринчи президенти икки мамлакат ўртасидаги қардошлик, яхши қўшничилик ва стратегик шериклик муносабатларини мустаҳкамлашга катта ҳисса қўшди.
Бугунги кунда Ўзбекистон ва Қозоғистоннинг кўп қиррали ҳамкорлиги изчил ривожланишда давом этмоқда ҳамда савдо-иқтисодий, инвестиция, энергетика, қишлоқ хўжалиги, транспорт-логистика, таълим ва бошқа устувор йўналишлардаги аниқ қўшма дастур ва лойиҳалар ҳисобига кенгайиб бормоқда.
Мулоқот чоғида етакчилар икки томонлама ва халқаро аҳамиятга молик қатор долзарб масалаларни муҳокама қилди. Коронавирус инфекциясининг тарқалишига қарши курашиш, пандемиянинг ўзаро манфаатли ҳамкорликка салбий таъсирини камайтириш бўйича ўзаро яқин мувофиқлашув ва шерикликни давом эттириш муҳимлиги таъкидланди.
Аввалроқ Қозоғистонда Нурсултон Назарбоевнинг 80 ёшга тўлиши муносабати билан унинг ҳайкали очилгани ҳақида хабар берилганди.
Эслатиб ўтамиз, 18 июнь куни Нурсултон Назарбоевнинг коронавирусга чалингани маълум бўлганди. Шундан сўнг Шавкат Мирзиёев Назарбоевга мактуб йўллаб, унинг тез орада тузалиб кетишини тилаганди. Кейинроқ Мирзиёев телефон орқали Нурсултон Назарбоевнинг ҳолидан хабар олганди. Коронавирусга чалингани сабабли Нурсултон Назарбоев Москвада 24 июнь куни бўлиб ўтган Ғалаба парадида иштирок эта олмади.
2 июль куни Нурсултон Назарбоев коронавирусдан тузалгани маълум қилинди. Шундан сўнг элбоши қозоғистонликларга мурожаат қилди.
Изоҳ (0)