Қашқадарё вилоятининг Деҳқонобод туманида 39 ёшли хотинини нотаниш эркакдан рашк қилган эр уни уриб ўлдириб қўйди. Бу ҳақда Деҳқонобод туман ИИБ бошлиғи Ғайрат Ҳайдаров ҳамда туман ҳокими ўринбосари Нодир Исмоилов иштирокида бўлиб ўтган қотиллик жинояти муҳокамасида маълум қилинган.
Таъкидланишича, воқеа 2020 йилнинг 3 июль куни кечки пайт содир бўлган.
Аниқланишича, марҳум аёл Р.Н. 2020 йил 3 июль куни соат 18:00 да турмуш ўртоғи Н.Ш. билан ўзаро тортишиб қолган. Турмуш ўртоғининг телефонда бошқа эркак билан суҳбатлашиб турганини эшитган Н.Ш. хотинига «Нима сабабдан бошқа эркак киши билан телефон орқали гаплашяпсан?» деб жанжал кўтарган ва турмуш ўртоғини калтаклаган. Калтаклаш оқибатида аёлининг чап кўзи ва орқа қисмига тан жароҳати етказган.
Эри томонидан аёвсиз калтакланган Р.Н. ўша куни оғир аҳволда туман тиббиёт бирлашмасининг жонлантириш бўлимига олиб келинган. Кўрсатилган тиббий ёрдамга қарамай, у вафот этган.
Марҳумнинг жасади суд тиббий экспертизадан ўтказилганда ўлим бош мия ёпиқ шикасти, бош мия тўқималарига қон қуйилиши, бош мия юмшоқ, қаттиқ пардаларига қон қуйилиши, бош мия лат ейиши, танасида кўплаб қон талашлар, шилинмалар орқали юзага келгани маълум бўлган.
6 июль, душанба куни туман оила ва маҳаллани қўллаб-қувватлаш бўлимида бўлиб ўтган қотиллик жинояти муҳокамасида сўз олган Деҳқонобод туман ИИБ бошлиғи Ғайрат Ҳайдаров қотиллик содир этилишидан бир кун олдин ҳам эр-хотин ўртасида можаро келиб чиққанини, аммо бундан МФЙ раиси ва ўринбосари, ҳатто профилактика инспектори ҳам бехабар қолганини танқид қилган.
«Бир кун олдин эр-хотин жанжал қилган. Оилада ўзаро келишмовчилик бўлган. Хўш, нега ўша аёл маҳалла раисининг хотин-қизлар масалалари бўйича ўринбосарига чиқиб, воқеани айтмаган? Нега қўни-қўшнилар бу ҳақда хабар бермаган? МФЙ раиси, унинг ўринбосари ва профиликтика инспекторининг тарғибот тадбирлари шу даражада самарасизми?», — деди Ғайрат Ҳайдаров.
Ғайрат Ҳайдаровнинг маълумот беришича, мазкур воқеа сабаб МФЙ раиси, унинг хотин-қизлар бўйича ўринбосари ва профиликтика инспекторининг эътиборсизлиги ўрганилмоқда.
«Профилактика инспекторининг эътиборсизлиги юзасидан хизмат текшируви бошланди, тез орада айбдорларга қилмишига яраша чора кўрилади», — дейди Деҳқонобод туман ИИБ бошлиғи.
Деҳқонобод туман маҳалла ва оилани қўллаб-қувватлаш бўлими бошлиғи Нодир Исмоилов эса бу мудҳиш ҳодиса тумандаги мавжуд 46 та МФЙ раиси ва масъулларига сабоқ бўлиши лозимлигини таъкидлади.
Деҳқонобод туман ИИБ бошлиғи ўринбосари Дилшод Мирзаевнинг қўшимча қилишича, мазкур ҳолат юзасидан туман ИИБ ҳузуридаги Тергов бўлими томонидан Жиноят кодексининг 104-моддаси 3-қисми «д» банди (Қасддан баданга оғир шикаст етказиш) билан жиноят иши қўзғатилиб, дастлабки тергов ҳаракатлари олиб борилмоқда. Марҳумнинг турмуш ўртоғи Ш.Н. эса шу куни гумонланувчи тариқасида қамоққа олинган.
Эслатиб ўтамиз, 2019 йил 10 октябрдан 11 октябрга ўтар кечаси соат 01:30 да деҳқонободлик Қ.Ф. исмли шахс шаръий никоҳидаги аёли М.А.ни аввал бўғиб, сўнгра ғишт бўлаги билан уриб ўлдиргани, сўнгра жасадини кул уюмига кўмгани ҳақида хабар берилганди.
Изоҳ (0)