Қозоғистоннинг Олмаота шаҳри расмийлари шаҳарда яқин кунларда кузатилаётган ўткир респиратор вирусли инфекциялар (ЎРВИ) ва пневмонияга чалинганлар сони ортганини эпидемия деб атади. Бу ҳақда шаҳар ҳокими Бакитжан Сағинтаев ўзининг Instagram’даги саҳифасида маълум қилди.

Фото: «Almaty.gov.kz»

«Сўнгги бир ой ичида шаҳарда ЎРВИ ва пневмония касалликлари сони 5 баравар ошди, буни биз эпидемиянинг намоён бўлиши сифатида кўряпмиз. Мос равишда тез ёрдамга мурожаатлар сони ҳам кескин ошди. Агар май ойида 2,5 мингтача қўнғироқлар қабул қилинган бўлса, июнь ойида суткасига 4 мингтагача чақириқлар бўлди. Битта бригадага тушадиган кунлик юкламалар сони икки баравар ошиб, 19 та қўнғироқни ташкил этмоқда», — деб ёзган ҳоким.

Унинг сўзларига кўра, ҳозирда коронавируснинг тарқалиши даврида юқумли касалликлар шифохонаси ва провизорлардан ташқари, бирламчи тиббий ёрдам хизматига юклама кескин ошган.

«Бугунги шароитда ушбу босқичда ‘юқумли касалликлар виртуал касалхонаси’ ташкил этилган. Поликлиникаларда COVID-19 симптомлари бўлган ва касаллик тасдиқланган мижозлар мониторинги учун мобил гуруҳлар тузилган. Асфендияров номидаги халқаро тиббиёт университети билан ҳамкорликда Кардиология ва ички касалликлар илмий-тадқиқот институти негизида Мижозлар мониторинги маркази очилди. Унинг вазифаси хавф остида бўлган беморларни кеча-ю кундуз кузатиб бориш ва даволашдир. Бу бизга амбулатория даражасида, айниқса қарияларда касаллик асоратларини минималлаштириш имконини беради», — деб таъкидлаган Олмаота ҳокими.

Айни пайтда коронавирус ва пневмонияга чалинганлар сони ортиб бориши бутун Қозоғистон бўйлаб кузатилмоқда. Олмаотада 6201 киши коронавирусга чалингани тасдиқланган. Шундан 2281 нафари соғайган, 26 нафари вафот этган. Бутун мамлакат бўйлаб эса коронавирусга чалинганлар сони 25 021 кишига етган. Ҳозирга қадар 15 860 киши соғайган, 188 киши вирус қурбонига айланган. Шунингдек, 23 553 киши коронавирусни белгисиз ташувчи сифатида қайд этилган.

Аввалроқ Бутунжаҳон шифокорлар касаба уюшмаси (WMA) собиқ раҳбари Леонид Эйдельман касалликнинг иккинчи тўлқинига жиддий тайёргарлик кўриш кераклиги, чунки у вақтда COVID-19 ЎРВИ эпидемияси даврида параллел равишда тарқалиши мумкинлигини айтиб ўтганди.