Афғонистон президентининг асосий маслаҳатчиларидан бири ва йирик бизнесмен Муҳаммад Юсуф Ғазонфар 3 июль куни коронавирус сабаб юзага келган пневмония оқибатида вафот этди. Бу ҳақда мамлакат раҳбарининг сайтида маълум қилинган.
Ғазонфар бир мунча вақт ўзини ёмон ҳис қилган. Бизнесменнинг ёрдамчиси Фрайдун Элҳамнинг сўзларига кўра, Ғазонфар Туркиядаги шифохоналарнинг бирида вафот этган.
Ғазонфар июнь охирларида коронавирусга чалинган эди, уни Афғонистонда даволашга уринишган, бироқ беморнинг аҳволи ўғирлашгач Туркияга олиб кетилган.
Асли келиб чиқиши ўзбек бўлган Муҳаммад Ғазонфар нафақат Ашраф Ғанининг иқтисодий тараққиёт, савдо ва камбағалликни қисқартириш масалалари бўйича маслаҳатчиси, балки унинг яқин дўсти ҳам бўлган. Сўнгги президентлик сайловларида у Ашраф Ғани сайловолди кампаниясининг 90 фоиз бюджетини молиялаштирган.
Афғонистондаги хусусий Гҳазанфар банкининг акциядори бўлган бизнесмен мамлакатдаги энг бадавлат инсонлардан бири саналган. «У президент Ғанининг дўсти ва унинг сўнгги сайловолди кампаниясининг бош ҳомийси, Афғонистон сиёсатининг энг нуфузли кучли учлигидан ўрин олганди», — дейилади хабарда.
Манбаларга кўра, бизнесмен Афғонистон президентининг турли кадрлар, иқтисодий ва сиёсий қарорларига кучли таъсир кўрсата олган, шунингдек, мамлакатнинг туркийзабон этник гуруҳлари расмийлари, хусусан, ўзбек гуруҳлари вакиллари билан алоқаларда унинг норасмий вакили бўлган.
Кобулдаги манбаларнинг таъкидлашича, Ғазонфарнинг Тошкентда ҳам «кучли алоқалари» бўлган, бу эса Афғонистонни қўллаб-қувватловчи минтақавий коалиция тузишга ёрдам берган ва бошқа этник гуруҳлар вакиллари орасида ҳам обрўга эга бўлган.
Газонфар афғон ўзбекларининг яна бир лидери, мунозарали обрўга эга нуфузли сиёсатчи, яқинда маршал унвонини олган Абдурашид Дўстумнинг сиёсий душмани ҳисобланади.
Сўнгги маълумотларга кўра, Афғонистонда коронавирусга чалинганлар сони 32 951 кишига етган. Ҳозирга қадар мамлакатда 864 киши COVID-19 қурбонига айланган.
Изоҳ (0)