Россия президенти Владимир Путин СССР конституциясида кўзда тутилган иттифоқчи давлатларнинг ягона давлатдан ажралиб чиқиш ҳуқуқини «вақти-соати келиб портлайдиган мина»га қиёслади. Бу ҳақда у «Россия» телеканалига берган интервьюсида айтиб ўтган, деб хабар бермоқда Meduza.
Путиннинг айтишича, СССР тузилаётган вақтдаёқ «иттифоқчи давлатларнинг ягона давлатдан ажралиб чиқиш ҳуқуқи ҳақида Ленин тезиси мустаҳкамланган бўлган». Сталин эса, Россия президентининг таъкидлашича, бошқа фикрда бўлган. У миллий бирлашмаларнинг автоном ҳуқуқда бўлиши тарафдори бўлган, яъни миллий бирлашмалар Россия таркибига автоном ҳудуд сифатида кириши керак бўлган.
Натижада республика СССР таркибидан қандай келган бўлса, шундай чиқиб кетиши мумкин эди. Амалда эса Собиқ иттифоқ республикалари мустақил бўлаётганда, тарихан Россия ҳудуди бўлган ерларни олиб иттифоқ таркибидан чиқиб кетган. Чунки Иттифоқдан чиқиш ҳуқуқи бор, лекин бу жараённинг тартиб-таомили белгиланмаган эди.
«СССРга қўшилган пайтдаги ери билан кецин эди, рус халқидан совғаларни ўзи билан олиб кетмасин эди», — дейди Путин.
Мавзуга доир: Путин СССР республикаларига «рус халқи томонидан берилган совғаларни» эслаб ўтди (видео)
Маълумот учун, Россия конституциясига тузатишлар киритиш бўйича таклиф 2020 йил бошида Путиннинг ўзи томонидан таклиф этилганди. Тузатишлар рўйхатига кейинчалик Путиннинг президентлик муддатларини ноллаштириб, унга навбатдаги сайловларда ҳам ўз номзодини қўйишга имкон берувчи банд ҳам қўшилган.
Конституциясига тузатишлар киритиш бўйича умумхалқ референдуми 1 июль куни якунланди. Марказий сайлов комиссияси маълумотларига кўра, сайловда иштирок этганларнинг 77,92 фоизи тузатишларга розилик билдирган, 21,27 фоизи қарши чиққан. Овоз беришда давомат 67,97 фоизни ташкил қилган. Конституцияга тузатишлар киритиш тўғрисидаги фармонини Путин 3 июль куни имзолади.
Изоҳ (0)