Бутун дунё бўйлаб 230 дан ортиқ олим Жаҳон соғлиқни сақлаш ташкилотига очиқ мактуб йўллаб, ташкилотдан коронавирусга қарши курашиш борасидаги тавсияларини қайта кўриб чиқишни сўради. Олимларнинг маълум қилишича, вирус ҳавода узоқ вақт туриб қолиб, инсонларга ортиқча хавф туғдириши мумкин, деб ёзади The New York Times.
Мактуб остига дунёнинг 32 мамлакатидан бўлган 239 нафар олим имзо чеккан. Уларнинг ҳисоблашича, вирус олдин тахмин қилинганидан кўра анча майда зарра кўринишида бир жойдан бошқа жойга ташилиши мумкин. Бу эса унинг ҳавода узоқ вақт қолиб кетиши ва организмга нафас олиш орқали юқишига имкон беради.
Бироқ ЖССТнинг таъкидлашича, вирус етарли даражада катта ва оғир томчилар шаклида бўлиб, ҳавога чиқиши билан горизонтал юзалар устига ўрнашади. Вирус бирор ташқи юза орқали тарқалишини исботловчи чекланган миқдорда далиллар борлиги сабаб ташкилот пандемия вақтида қўлни ювиш касаллик профилактикасининг асосий усули эканлигига бор эътиборини қаратган.
ЖССТнинг инфекцияга қарши кураш бўйича техник раҳбари Бенедетта Аллегранзининг маълум қилишича, вируснинг ҳаво орқали тарқалиши тўғрисидаги далиллар ишонарли эмас.
«Асосан сўнгги икки ойдан бери бир неча бор вирус ҳаво орқали юқиши мумкинлигини маълум қилдик, бироқ буни исботловчи бирор аниқ исбот келтирилмади. Бу борада баҳслар ҳали давом этмоқда», — дейди Аллегранзи.
Нашрнинг таъкидлашича, вируснинг ҳаво орқали тарқалиши борасидаги фикрлар қабул қилингудек бўлса, бу коронавирус сабаб жорий этилган эҳтиёт чораларининг ўзгартирилишига олиб келади. Одамлар бино ичида ниқобда юриши, шифокорлар эса энг майда зарраларни ҳам ўтказмайдиган фильтрга эга тиббий ниқобларни тақиши шарт бўлади.
Аввалроқ олимлар бассейн ва сув ҳавзалари орқали, коронавирус юқтириб олиш эҳтимолини баҳолагани тўғрисида, вирусни озиқ-овқатлар орқали юқтириб олишдан сақланиш йўллари тўғрисида хабар берилган эди.
Изоҳ (0)