Ўзбекистон Президент Шавкат Мирзиёев раислигида одил судловни таъминлаш ҳамда коррупцияга қарши курашиш тизимини такомиллаштиришга бағишланган видеоселектор ўтказилди. Йиғилишда суд-ҳуқуқ тизими танқид қилинган ва Андижон шаҳри ҳамда Чироқчи туманидаги ички ишлар органлари биноларида қийноқ ҳолатлари кузатилганига муносабат билдирилган. Бу ҳақда «Kun.uz» хабар берди.
«Биз сўнгги уч ярим йилда қийноқларга йўл қўймаслик бўйича жиддий ва ортга қайтмайдиган ислоҳотларни амалга оширдик. Лекин Андижон шаҳри ва Чироқчи туман ички ишлар идораларида яқинда содир бўлган фожиали ҳолатлар тизим раҳбарларини уйғотиши, аниқ хулосалар қилишга чорлаши керак.
Ушбу фожиа оқибатида 2 нафар инсон ҳаётдан эрта кўз юмди. Уларнинг оилалари бу ҳуқуқ-тартибот идоралари раҳбарларидан эмас, давлатдан норози.
Нима учун тезкор-қидирув ва терговни назорат қилувчи прокурорлар, ички ишлар раҳбарлари бунга биз айбдормиз, деб чиқиб айтмайди. Ўша ходимларнинг билимини оширмадик, қонун билан ишлаш, одамлар билан муомала қилишга ўргатмадик, деб нима учун халқдан кечирим сўрамайсизлар? Бу каби нохуш ҳолатлар такрорланмаслиги учун қайси тизим ёки ҳудудий идора раҳбари аниқ режа ёки дастур ишлаб чиқди?
Минг афсус билан айтиш керак, сизлардаги лоқайдлик ва билимсизлик ислоҳотларимизни обрўсизлантирмоқда», — деди Шавкат Мирзиёев.
Президентнинг маълум қилишича, ушбу жиноятларга алоқадор 11 нафар ички ишлар ходими қонун олдида жавоб бермоқда. 7 нафар раҳбар лавозимидан озод этилди, яна 16 нафари интизомий жавобгарликка тортилди.
Эслатиб ўтамиз, 2020 йил 13 июнда Андижонда қийноққа солинган фуқаро вафоти сабаб 3 нафар ИИБ ходими ҳибсга олинган, воқеа 30 майда Андижон шаҳар Салоҳият кўчасида яшовчи фуқаро А.А. тан жароҳатлари билан касалхонага олиб келинишидан бошланган. Фуқаро 11 июнда вафот этган. 14 июнь куни Андижон вилояти Андижон шаҳар бўйича ички ишлар органлари (ИИО) фаолиятини мувофиқлаштириш бошқармаси (ФМБ) бошлиғи подполковник Содиқ Усмонов мазкур воқеа сабаб ишдан олинди. Кейинроқ ИИБда беш киши ишдан олингани ва 19 киши жазолангани маълум қилинди.
2020 йилнинг январь ойида Қашқадарё вилоятининг Чироқчи туманида яшовчи 32 ёшли эркак А.Ю. мол ўғрилигида гумон қилиниб, ИИБ ходимлари томонидан калтакланиши оқибатида вафот этган. Мазкур воқеа ортидан вилоят ИИБ бошлиғининг биринчи ўринбосари лавозимидан кетган. Туман ИИБнинг икки ходими, шу жумладан, туман ИИБ раҳбари қамоққа олинган. Фуқаронинг уриб ўлдирилишида яна 13 нафар ходимнинг қўли борлиги маълум қилинди.
Изоҳ (0)