Фарғона вилоятида темир йўл шпалларидан 48 дона «закладной» болт ва 60 дона гайкани ўғирлаган фуқаро фош қилинди. Бу ҳақда Ички ишлар вазирлиги ахборот хизмати хабар қилган.
Хабарга кўра, 28 июнь куни Фарғона вилояти ИИБ Транспортда хавфсизликни таъминлаш бошқармасига Қўқон темир йўл масофаси бошлиғи томонидан маълумот юборилган. Унда 27 июнь куни корхона ишчилари томонидан «Фурқат-Олтиариқ» темир йўл бекатлари оралиғининг 222 километри 6-7-пикетлари орасида мавжуд шпалларнинг 48 дона «закладной» болтлари ва 60 дона гайкалари номаълум шахс томонидан ечилиб ўғирлаб кетилгани, ушбу ҳолат поездлар ҳаракатига хавф туғдириши мумкинлиги маълум қилинган.
Ҳолат юзасидан олиб борилган тезкор-қидирув тадбирлари натижасида Ф.Х. 26 июнь куни уйидаги чорва молларига ўт ўриш учун қишлоғи яқинидан ўтган темир йўл бўйига чиққани,«Фурқат-Олтиариқ» бекатлари оралиғи 6-7-пикетларида темир йўл шпалларига маҳкамланган бир нечта болт-гайкаларни қўли билан бураб, суғуриб олгани аниқланди. У болтлар ва гайкаларни 27 июнь куни М.С. исмли аёлга 192 минг сўмга сотган.
ИИВ ахборот хизматининг қайд этишича мазкур ҳолат юзасидан терговга қадар текширув ҳаракатлари давом этмоқда.
Изоҳ (0)