Молдова президенти Игорь Додон Москва шаҳридаги парадга бориб келганидан кейин Холерканадаги резиденциясида ўзни яккалаш тартибига ўтди. Бу ҳақда унинг ўзи TV8 телеканалининг «Президент жавоб беради» теледастурида маълум қилган.
«Мен маълум вақт давомида ижтимоий изоляцияда бўламан. 48 ёки 72 соат, умуман қанча вақт талаб қилинса, шунча пайт ўзни яккалаш тартибига риоя қиламан. Оммавий тадбирларда иштирок этмайман. Лекин келаси ҳафтада Окницадаги учрашувга бораман», — деган Додон.
Молдова президентининг сўзларига кўра, у Москвага сафар олдидан икки марта коронавирусга тест топширган. Молдова номидан парадда иштирок этган 75 нафар аскарнинг ҳаммаси соғлом.«Россияга борган делегация вакилларининг ҳаммасида тест натижаси манфий чиққан. Ҳарбийлар ҳам Москвага борган ва бошқа давлатлардан фарқли равишда уларнинг ҳеч бирида коронавирус инфекцияси аниқланмаган. Масалан, айрим мамлакатларда 70-80 нафар аскарнинг 50-60 нафарида коронавирус аниқланган. Бизда эса барча 75 нафар аскар соғлом ва коронавирусдан холи», — деган Молдова президенти.
Додон ён-атрофидаги кишилар орасида COVID-19 билан касалланганлар борлиги ҳақидаги хабарларни ҳам инкор қилган. У пандемия даврида президентурада 1 та, Давлат қўриқлаш хизматида 5-6 та ҳолат қайд этилганини билдирган.
Изоҳ (0)