АҚШ Конгрессининг Вакиллар палатаси 26 июнь куни Вашингтон шаҳрининг мақомини ўзгартириш учун овоз беради. Бу ҳақда палата спикери Нэнси Пелосига таяниб, Fox News хабар берди.
«Биз демократиямизга қарши бўлган ушбу адолатсизликка барҳам берамиз», — дейди Пелоси.
Унинг сўзларига кўра, Колумбия округи аҳолиси солиқ тўлайди, армияда хизмат қилади ва АҚШнинг иқтисодий ҳаётига кўмаклашади, бироқ уларда овоз бериш ҳуқуқи мавжуд эмас.
Вашингтонни штатга айлантириш учун овоз бериш жараёнларини ўтказиш ташаббуси Демократлар партиясидан бўлган конгрессменлардан чиққан. Бугунги кунда Америка пойтахти Колумбия федерал округи мақомига эга ва бирорта штат таркибига кирмайди, бу эса шаҳар аҳолисига федерал конгрессда ўз номзодларини танлаш ҳуқуқидан маҳрум қилади.
Қонун кучга кириши учун АҚШ парламентининг иккала палатаси ҳам уни қўллаб-қувватлаши, шундан сўнг мамлакат президенти тасдиқлаши керак. Агарда бу содир бўлса, Вашингтон АҚШнинг 51-штатига айланади.
АҚШдаги Колумбия федерал округининг аксарият аҳолиси 2016 йилнинг 8 ноябрь куни бўлиб ўтган референдум чоғида маъмурий мақомни штатга ўзгартириш учун овоз берган эди.
Мавзуга доир: Пуэрто-Рикода АҚШга қўшилиш бўйича референдум ўтказилади
Изоҳ (0)