Moldova prezidenti Igor Dodon Moskva shahridagi paradga borib kelganidan keyin Xolerkanadagi rezidensiyasida o‘zni yakkalash tartibiga o‘tdi. Bu haqda uning o‘zi TV8 telekanalining “Prezident javob beradi” teledasturida ma’lum qilgan.
“Men ma’lum vaqt davomida ijtimoiy izolyatsiyada bo‘laman. 48 yoki 72 soat, umuman qancha vaqt talab qilinsa, shuncha payt o‘zni yakkalash tartibiga rioya qilaman. Ommaviy tadbirlarda ishtirok etmayman. Lekin kelasi haftada Oknitsadagi uchrashuvga boraman”, — degan Dodon.
Moldova prezidentining so‘zlariga ko‘ra, u Moskvaga safar oldidan ikki marta koronavirusga test topshirgan. Moldova nomidan paradda ishtirok etgan 75 nafar askarning hammasi sog‘lom.“Rossiyaga borgan delegatsiya vakillarining hammasida test natijasi manfiy chiqqan. Harbiylar ham Moskvaga borgan va boshqa davlatlardan farqli ravishda ularning hech birida koronavirus infeksiyasi aniqlanmagan. Masalan, ayrim mamlakatlarda 70-80 nafar askarning 50-60 nafarida koronavirus aniqlangan. Bizda esa barcha 75 nafar askar sog‘lom va koronavirusdan xoli”, — degan Moldova prezidenti.
Dodon yon-atrofidagi kishilar orasida COVID-19 bilan kasallanganlar borligi haqidagi xabarlarni ham inkor qilgan. U pandemiya davrida prezidenturada 1 ta, Davlat qo‘riqlash xizmatida 5-6 ta holat qayd etilganini bildirgan.
Izoh (0)