АҚШда коронавирус сабабли аҳолига берилган рағбатлантирувчи тўловни олганлар қаторида 1 миллиондан ортиқ вафот этган одам борлиги аниқланди

АҚШ ҳукумати коронавирус пандемияси фонида вафот этган кишиларга рағбатлантирувчи тўлов сифатида 1,4 миллиард доллардан ортиқ маблағ тўлаган. Бу ҳақда мамлакат Ҳисоб палатасининг ҳисоботига таяниб, «РБК» хабар берди.

Маълум қилинишича, 30 апрель ҳолатига кўра, умумий қиймати 1,4 миллиард доллар бўлган 1,1 миллионта тўлов вафот этган кишилар номига жўнатилган.

Ҳисоботда қайд этилишича, солиқ бошқармаси ва Молия вазирлиги 269 миллиард доллар миқдоридаги 160,4 миллионта тўловни тезкорлик билан тўлашни бошлаган. Бироқ баъзи шахсларга тўловларни етказишда қийинчиликларга ҳамда тўловларни олиш ҳуқуқига эга бўлмаганлар — вафот этганлар ёки фирибгарларга нисбатан хатарларга дуч келинган.

Ҳисоб палатасининг маълум қилишича, шошилишлар сабабли рағбатлантирувчи тўловларни олувчиларнинг маълумотлари вафот этганларни рўйхатга олиш базаси маълумотлари билан солиштирилмаган. Солиқ хизмати эса 2018 ва 2019 йилда солиқ декларацияси топширган, бироқ кейин вафот этган шахсларга тўловни рад этиш учун юридик асосга эга бўлмаган.

Шу сабабли АҚШ Ҳисоб палатаси солиқ хизматига хато сабабли олинган тўловларни қайтариш усули ҳақида огоҳлантиришнинг иқтисодий самарали йўлини кўриб чиқишни тавсия қилган.

Март ойининг охирида АҚШ президенти Дональд Трамп вирус сабабли мамлакат иқтисодиётига ёрдам бериш учун 2 триллион доллар ажратиш ҳақидаги қонунни имзолаган. Мазкур молиявий ёрдам пакети мамлакат тарихидаги энг йириги бўлди. Маблағлар соғлиқни сақлаш тизимини қўшимча молиялаштиришга, бизнесни қўллаб-қувватлашга ва америкаликларга рағбатлантирувчи тўловларни амалга оширишга йўналтирилган.

Йиллик даромади 75 минг долларгача бўлган фуқаролар 1,2 минг доллар олади, болалари бўлган оилалар эса ҳар бир бола учун 500 доллардан олади. Ёрдам ўз ишидан ажралганлар ва иш ҳақи камайтирилганлар учун мўлжалланган. АҚШ ҳукумати компанияларга қарз бериш учун 367 миллиард доллар, касалхоналар эҳтиёжи учун яна 130 миллиард доллар йўналтиради.

Жонс Ҳопкинс университети маълумотларига кўра, АҚШда пандемия бошидан буён 2,4 миллион киши коронавирус билан касалланган. Шу билан бирга, АҚШ Касалликлар назорати ва олдини олиш маркази директори Роберт Редфилднинг маълум қилишича, мамлакатда, тахминан, 25 миллион киши коронавирус билан зарарланган бўлиши мумкин, бу эса расмий кўрсаткичлардан ўн баравар кўп ҳисобланади.