АҚШ президенти Дональд Трамп Венесуэла президенти Николас Мадуро билан учрашишга тайёрлигини, бироқ бу учрашув фақат Мадуронинг ҳукуматдан кетишини муҳокама қилиш учун ўтказилиши мумкинлигини маълум қилди. Бу ҳақда Трамп ўзининг Twitter’даги саҳифасида ёзди, деб хабар бермоқда «РБК».
«Мен Мадуро билан фақат бир нарсани муҳокама қилиш учун учрашган бўлардим: ҳукуматдан тинч йўл билан кетиш», — деб ёзган Трамп.
Трампнинг қўшимча қилишича, у ҳар доим социализмга қарши чиқади ва Венесуэла халқини қўллаб-қувватлайди. Президентнинг қайд этишича, унинг маъмурияти «Мадуронинг деспотик режимини» қоралайди.
Ўз навбатида, Мадуро Трамп билан мулоқотга тайёрлигини, бироқ мулоқот ҳурмат асосида ўтиши кераклигини маълум қилган. «Агар зарур бўлса, мен Дональд Трамп билан ҳурмат асосида суҳбат ўтказишга тайёрман», — дея маълум қилган Венесуэла президенти.
Аввалроқ Трамп Axios нашрига берган интервьюсида Мадуро билан учрашиши мумкинлигини маълум қилган. АҚШ президентининг маълум қилишича, Мадуро у билан учрашиш ниятини билдирган, унинг ўзи эса камдан кам ҳолларда учрашувларга қарши чиқади.
2019 йилнинг февраль ойида Трамп Мадуронинг учрашиш ҳақидаги сўровига рад жавобини берганини маълум қилган. Трамп ўзининг рад жавобини Венесуэлада «даҳшатли нарсалар» юз бераётгани билан изоҳлаган.
Эслатиб ўтамиз, АҚШ 2020 йилнинг март ойида Мадурони гиёҳванд моддалар савдосида айблаган ва унинг айбини исботловчи далиллар учун 15 миллион доллар мукофот пули ваъда қилинганди. Венесуэла мухолифати эса Американинг Silvercorp хусусий ҳарбий компанияси билан мамлакатга бостириб кириш ва президент Николас Мадурони ҳокимиятдан ағдариш бўйича 213 миллион долларлик келишув имзолаган. АҚШ давлат котиби Майкл Помпео эса ёлланма жангариларнинг Венесуэлага бостириб киришга уринишига АҚШнинг алоқадорлигини рад этган.
Изоҳ (0)