Қозоғистоннинг Сайрам туманидан имом-ноиб сифатида қилган маъруза ва дарслари билан танилган ўзбекистонлик Маъмуржон Ҳайитметов 17 июнь куни Қозоғистон Миллий хавфсизлик қўмитаси томонидан ҳибсга олинди, деб хабар беради BBC.
Таъкидланишича, Ҳайитметовга бундан 6 йил олдин насронийлик дини ҳақида қилган маърузаси бўйича диний адоват қўзғаш айби қўйилмоқда.
Маълумотларга кўра, Ҳайитметов 17 июнь куни Сайрамдаги МХҚ идорасига чақиртирилган. Машинасида идорага кетаётган вақтида уни йўлда ниқобли МХҚ ходимлари тўхтатиб, омманинг кўз олдида ушлаб олиб кетган. Домлани қўлга олиш жараёни ижтимоий тармоқларда тарқалган видео ва суратларда акс этган. 44 ёшли Ҳайитметов Қозоғистон Жиноят кодексининг 174-моддаси 2-банди билан тергов қилинмоқда. Ушбу модда ижтимоий, миллий, уруғга оид, ирқий, табақавий ёки диний адоват қўзғаш жинояти ҳақида.
2014 йилда Сайрам туманидаги «Жалол ота» масжидида ўтган дарси бўйича Маъмуржон Ҳайитметовга ўз хизмат мансабидан фойдаланган ҳолда фуқароларнинг миллий шаънини таҳқирлаб, диний адоват қўзғаш айби қўйилмоқда. Мазкур модда бўйича айбланган шахс 5 йилдан 10 йилгача озодликдан маҳрум қилиниши мумкин.
Қайд этилишича, Маъмуржон Ҳайитметов ҳибсга олиниши арафасида Манкент қишлоғи ва атрофдаги қишлоқларда яшаган яна 3-4 йигит қўлга олинган. Миллий хавфсизлик қўмитаси томонидан тасвирга туширилган, уларни қўлга олиш жараёни акс этган видео ҳам ижтимоий тармоқларга сиздирилган.
«Бу ёшларга диний адоват қўзғашдан ташқари терроризм билан боғлиқ видеоматериаллар тарқатган, деган айб ҳам қўйилган. Бизнинг тушунишимизча, ушбу болаларни Маъмуржон домланинг видеоларидан таъсирланган, деган маъно билан боғлашмоқчи, шекилли», — дейилади хабарда.
Яқинлари Маъмуржон Ҳайитметовни ҳимоя қилиш учун адвокат ёллаган. Миллий хавфсизлик қўмитаси ходимлари Ҳайитметовни яқинларидан тергов вақтида идора атрофида тўпламасликни сўраган.
Изоҳ (0)