Бир неча ой давом этган инқироз ва қулашлардан кейин туризм соҳаси дунёнинг айрим давлатларида қайта тиклана бошлади. Бу ҳақда БМТнинг Жаҳон туризм ташкилоти (UNWTO) маълумот берган, деб хабар қилди «Интерфакс» .
«Туризм дунёнинг кўплаб мамлакатларида, хусусан, ернинг шимолий ярим шарида аста-секин қайта тикланмоқда. Айрим давлатлардаги халқаро саёҳатларга қўйилган тақиқ ҳам сақланиб турибди, туризм эса пандемия туфайли энг кўп зарар кўрган соҳалардан бири бўлиб қолмоқда», – дейилади хабарда.
UNWTO мамлакатларнинг ҳукуматларига мурожаат қилиб улардан миллионлаб ходимлар банд бўлган, айрим давлатларда иқтисодиётнинг асоси бўлган соҳани қўллаб-қувватлашни сўраган.
«Туризмнинг қайта тикланиши давлатлар учун асосий йўналишлардан бирига айланиши ва соҳа хавфсизлиги таъминланиши лозим. Улар туризмни иқтисодий жиҳатдан қўллаб-қувватлаш ва унинг тикланиши учун Евроиттифоқ, Франция ва Испаниядаги каби шароит яратиши зарур», – деган UNWTO бош директори Зураб Пололикашвили.
Мавзуга доир: Бутунжаҳон туризм ва саёҳатлар кенгаши туризм учун энг хавфсиз бўлган мамлакатларни эълон қилди
«Бунда айниқса Осиё – Тинч океани минтақаси катта зарар кўрган, ҳудудга қилинадиган саёҳатлар январь – апрель ойларида 51 фоизга қисқарган. Европа бу борада иккинчи (44 фоизга), кейинги ўринларда Яқин Шарқ (40 фоизга), Америка қитъаси давлатлари (36 фоизга) ва Африка (35 фоизга) қайд этилган», – дейилади UNWTO хабарида.
Май ойи бошида ташкилот 2020 йилнинг қолган қисмида туризм соҳасини кутаётган учта сценарийни эълон қилган. Уларда давлат жорий этган чеклов чоралари туфайли туристлар оқимининг 58 – 78 фоизга пасайиши тахмин қилинган.
«COVID-19 пандемияси сабаб халқаро туристик саёҳатлар 850 миллиондан 1,1 миллиардгача, соҳа молиявий зарари эса 910 миллиарддан 1,2 триллион долларгача камаяди. Туризмда 100 – 120 миллион иш ўрни хавф остида қолган», – дейилган баёнотда.
Изоҳ (0)