ДХХ ва прокуратура ходимлари томонидан ўтказилган тезкор тадбир давомида бир фуқаронинг ҳақиқий ҳарбий хизматга чақирилишида ёрдам бериш учун пора талаб қилган ҳарбий қисм офицери қўлга олинди. Бу ҳақда «Ахборот 24» дастурида маълум қилинди.
Маълумотларга кўра, Тошкент вилоятида жойлашган Мудофаа вазирлиги тизимидаги ҳарбий қисмлардан бирида хизмат қилувчи майор унвонидаги ҳарбий хизматчи маҳаллий фуқародан шартнома асосида ҳақиқий ҳарбий хизматга қабул қилинишига ёрдам бериш эвазига 3 минг доллар олган вақтида қўлга олинган.
Дастлабки суриштирув ҳаракатлари давомида у муқаддам бошқа бир фуқарони шартнома асосида ҳақиқий ҳарбий хизматга чақирилиши учун ёрдам беришини ваъда қилиб, 700 доллар олгани ҳам маълум бўлган.
Майор унвонига эга офицернинг бундай ноқонуний хатти-ҳаракатларини амалга оширишида воситачилик қилган аёл ҳам тезкор тадбир давомида қўлга олинган.
Аввалроқ Самарқандда тиббий комиссиядан ўтказиб бериш эвазига 600 доллар пора олган шифокор қўлга олингани тўғрисида хабар берилганди.
Изоҳ (0)