Buxorodagi harbiy qismlarning birida ishlab kelgan Mahmud Jumayev (ism-shariflar shartli) 18-avgust kuni 3000 AQSh dollari miqdoridagi pora bilan qo‘lga olindi. Bu haqda “Daryo”ga Buxoro viloyat IIB matbuot xizmati ma’lum qildi.

Foto: Google Photos

Buxoro tumanidagi Qo‘shxodim qishlog‘ida yashovchi, 26 yoshli Mahmud Jumayev bir necha yildan buyon Buxorodagi harbiy qismlardan birida faoliyat yuritib kelgan. U egallab turgan lavozimidan foydalanib, Kogon shahrida istiqomat qiluvchi Farhod Boyzoqovga ukasi Dilshod Mansurovni vakolatli tanishlari orqali harbiy qismlardan biriga ishga kiritib qo‘yishni va’da bergan. Buning evaziga F. Boyzoqovdan 4000 AQSh dollari miqdorida pora berishini talab qilgan.

18-avgust kuni soat 15:20 da Buxoro shahridagi “Karvon” buyum bozori qarshisidagi bekatda Mahmud Jumayev kelishilgan puldan 3000 AQSh dollarini olayotgan vaqtida Departamentning Buxoro viloyati boshqarmasi xodimlari tomonidan qo‘lga olingan. Holat xolislar ishtirokida hujjatlashtirilgan.

Mahmud Jumayevga nisbatan Jinoyat Kodeksining 168-moddasi 3-qismi va 211-moddasi 1-qismi bilan jinoyat ishi qo‘zg‘atilib, dastlabki tergov harakatlari olib borilmoqda.