Қашқадарё вилоятининг Касби туманида Nexia ва Tico иштирокида ЙТҲ содир бўлди. Воқеани ўрганган ЙПХ инспекторлари ЙТҲга йўлнинг носозлиги сабаб бўлганини айтмоқда. Бу ҳақда «Дарё»га Касби туман ИИБ Йўл ҳаракати хавфсизлиги бўлими бошлиғи Олим Эшмаматов хабар берди.
Жорий йилнинг 11 июнь куни Косон—Қарлиқ—Муборак автомобиль йўлининг Майманоқ қишлоғидан ўтувчи 11-километрида йўл транспорт ҳодисаси содир этилган. Ҳайдовчи О.О. бошқарувидаги Nexia орқага бурилаётган М.И. бошқарувидаги Tico’га урилган. Оқибатда Tico автомашинасидаги йўловчилар — 32 ёшли аёл ва унинг 7 ёшли қизи жароҳат олган. Жабрланувчилар зудлик билан Касби туман тиббиёт бирлашмасига ётқизилиб, даволаш ишлари бошланган.
Ҳодиса жойига етиб борган Касби туман йўл ҳаракати хавфсизлиги инспекторлари воқеа сабабларини ўрганган ва ЙТҲга ҳайдовчиларнинг айбидан ташқари йўлнинг носозлиги ҳам сабаб бўлган, деган хулосага келган.
Туман ЙПХ инспекторлари бошлиғи Олим Эшмаматовга кўра, ҳодиса содир бўлган йўлда йўл кесишмаларини англатувчи белгилар мавжуд эмас. Шунингдек, йўл носоз, пиёдалар йўлаги ва ҳатто йўл ётиқ чизиқлари ҳам чизилмаган.
Касби туман ИИБ йўлдаги камчиликлар бартараф этилишини сўраб, мазкур ҳудуддаги йўлларни назорат қилувчи Косон туман йўллардан фойдаланиш унитар корхонаси, Косон туман ҳокимлиги ва прокуратурасига тақдимнома киритган.
Изоҳ (0)