Фарғона вилоятининг Тошлоқ туманида 12 июнь куни одам ўлими билан якунланган йўл-транспорт ҳодисаси содир бўлди. Бу ҳақда «Дарё»га вилоят ИИБ ахборот хизмати маълум қилди.
Ҳодиса «Кўлариқ» МФЙ ҳудудидан ўтувчи маҳаллий йўлда юз берган. 1985 йилда туғилган Н.А. бошқарувидаги «ГАЗ-53» йўлни белгиланмаган жойидан кесиб ўтаётган пиёда, 2015 йилда туғилган Э.М.ни уриб юбориб, ЙТҲ содир этган.
ЙТҲ оқибатида тан жароҳати олган 5 ёшли бола шифохонада вафот этган.
Мазкур ҳолат юзасидан Тошлоқ тумани ИИБ ҳузуридаги тергов бўлинмаси томонидан Жиноят кодексининг 266-моддаси 2-қисми («Одам ўлимига сабаб бўлган транспорт воситалари ҳаракати ёки улардан фойдаланиш хавфсизлиги қоидаларини бузиш») билан жиноят иши қўзғатилиб, тергов ҳаракатлари олиб борилмоқда. Ушбу ҳолат бўйича айбдор деб топилган шахс 7 йилгача озодликдан маҳрум этилиши мумкин.
Жиззах вилоятининг Бахмал туманида юз берган ЙТҲ ҳам 5 яшар боланинг ўлимига сабабчи бўлди. «Тонготар» қишлоқ фуқаролар йиғинида истиқомат қилувчи М.Э. Damas автомашинасини «Боғишамол» қишлоқ фуқаролар йиғини ҳудудидан ўтган Ўсмат—Аламли—Килдон йўналиши бўйича бошқариб кетаётиб вояга етмаган 5 ёшли ўғил болани уриб юборган. Бола воқеа жойида вафот этган.
ИИВ Бахмалдаги ЙТҲ қайси куни содир бўлганига аниқлик киритмаган. Ҳозирда ушбу ҳолат юзасидан ҳам жиноят иши қўзғатилган.
Фарғона вилоятида авваллари ҳам вояга етмаган болаларнинг ўлими билан якунланган ЙТҲлар содир бўлганди. 1 июнь куни Учкўприк туманида Lacetti ағдарилиб кетиши оқибатида 14 ёшли бола, 17 ва 18 майдаги ЙТҲларда 3 ёшли болалар вафот этганди. Жиззах вилоятининг Шароф Рашидов туманида 30 май куни 15 ёшли бола қаровсиз қолдирилган машинани юргизиб юбориши оқибатида 6 ёшли бола вафот этганди.
Изоҳ (0)