Москвада «Мостранспроект» илмий институтига тегишли ҳайдовчисиз бошқариладиган Hyundai Solaris биринчи бор ЙТҲга учради. Машина Audi А6 модели билан тўқнашув содир этган бўлиб, унинг ҳайдовчиси телефонига чалғиб қолгани сабаб мазкур кўнгилсиз ҳодиса юзага келган, деб хабар беради Motor.
Авария оқибатида ҳайдовчисиз бошқариладиган автомобилнинг орқа қисмига зарар етган. Solaris’нинг бампери ва юкхонаси эгилган. Бироқ «Мостранспроект» вакилларининг сўзларига кўра, ҳозирча ҳайдовчисиз бошқариладиган тизимга шикаст етган ёки етмагани номаълум. Илмий институт мутахассислари етказилган зарар ҳақида кейинроқ маълумот беради.
Audi ҳайдовчиси ҳеч қандай жароҳат олмаган, бироқ тўқнашув содир бўлган тор кўчада бир томонлама ҳаракат тўхтаб қолган ва бошқа ҳайдовчилар айланма йўлни қидиришга мажбур бўлган. Ҳаракат ЙХҲБ ходимлари етиб келгандан сўнг, қайта тикланган.
Аварияга учраган ҳайдовчисиз бошқариладиган Hyundai Solaris йўл қоидалари бузилишини автоматлашган тарзда қайд этади. Автомобиль ҳайдовчисиз режимда пулли автотураргоҳлар бўйлаб ҳаракатланади ва фотовидео қайд этиш комплекси ёрдамида қоидабузарларни аниқлаб боради.
Аввалроқ Hyundai компанияси ҳайдовчисиз бошқариладиган автомобиллар ишлаб чиқаришга 2 миллиард доллар ажратиши ҳақида хабар берилганди.
Изоҳ (0)