Германиянинг Auto Bild нашри Техник назорат ташкилоти (TÜV) билан биргаликда Европа бозорларидаги минилган энг ишончли ихчам кроссоверлар рўйхатини тақдим этди, деб хабар беради Motor.
Рўйхатнинг биринчи поғонасидан 2015 йили сотувга чиққан Mazda CХ-3 ўрин олди. Кроссовер Mazda2 базасида яратилган бўлиб, техник жиҳатдан уни ортда қолдиради — модель Европада тавсия қилинадиган CХ-5’га яқинроқ туради. Бироқ харидорларга минилган автомобилнинг амортизаторларига эътибор бериш тавсия қилинади.
Иккинчи ўрин бир неча бор TÜV’нинг эътирофига сазовор бўлган Volkswagen Tiguan платформасида яратилган Audi Q3’га насиб этди. Экспертларнинг фикрича, Q3’нинг муаммоли жойи — тормоз дискларининг занглашида.
Шунингдек, рўйхатдан энг ишонли япон кроссоверларидан ҳисобланувчи Suzuki SX4 S-Cross ҳам ўрин олган, бироқ унда мой сарфи билан боғлиқ муаммо кузатилган. Suzuki’нинг яна бир модели — Vitara рейтингдан ўрин олган. Ундан кейинги поғонада эса 2019 йили ишлаб чиқаришдан олинган Opel Mokka X жойлашган.
2009 йилдан буён ишлаб чиқариладиган BMW Х1’нинг барча авлодлари ишончли деб топилган, аммо экспертлар харидорларга кроссовернинг тормоз тизимига эътибор қаратишни маслаҳат беради. Бу каби муаммо Mitsubishi АSX’да ҳам кузатилиши мумкин.
Renault Captur ҳам TÜV’нинг юқори баҳосига сазовор бўлган, француз кроссворининг биргина муаммоси — подвескаси, биринчи авлод Nissan Qashqai’да ҳам шу каби камчилик мавжуд.
Шунингдек, Ford EcoSport, Nissan Juke, Peugeot 2008 ва Renault Duster моделларининг ишончлилигида муаммо пайдо бўлган. Айниқса Duster’да — мутахассислар мазкур кроссовернинг минилганини харид қилишни тавсия этмайди.
Эслатиб ўтамиз, TÜV ташкилоти мутахассислари апрель ойида Европа бозорларида сотилаётган деярли бузилмайдиган автомобиллар рейтингини тузиб чиққанди.
Мавзуга доир: Дунёдаги энг яхши автомобиль номи эълон қилинди
Изоҳ (0)