АҚШ Миллий баскетбол ассоциацияси коронавирус сабаб тўхтаб қолган мавсумни қайта бошлашга тайёрланмоқда. Ўйинчиларнинг инфекция юқтириб олиш хавфини камайтириш мақсадида касаллик белгиларини кузатувчи махсус узуклардан фойдаланилади, деб хабар беради The Athletic.
Бундан ташқари, баскетболчилар NBA 2К спорт симулятори ёрдамида дам олади ва ўйинчилар орасидаги масофа 1,5 метрдан камайиб кетса сигнал берадиган браслетларни тақиб юради. Уларнинг ҳаётига кириб борадиган яна бир технологик қўшимча — бу Oura узуги. Ғарбий Виржиния университетининг аниқлашича, узук томонидан тўпланган ва иловадаги сўров натижасида олинган маълумотлар инсоннинг коронавирусга чалинганини 90 фоиз аниқликда прогноз қилишда етарли ҳисобланади.
Oura’нинг «ақлли» узуклари намликка чидамли титан корпусдан ясалган бўлиб, у бир марта қувватланиш орқали 7 кун ишлай олади. Қурилма функциялари билан смарт-соатлар ва фитнесс-треклардан фарқ қилмайди. Узукка инфрақизил ёруғликдиод датчиклари, термометр, шунингдек, акселерометр ва гироскоп ўрнатилган. Қурилма маълумотларни олти ҳафтагача сақлай олиши ва уни Android ёки iOS-смартфонларга узатиши мумкин.
Таъкидланишича, узукни тақиш мажбурий эмас. Шунингдек, илова ўйинчининг касал эканлигини кўрсатмагунча шифокорлар ва бегоналар унинг соғлиғи тўғрисидаги маълумотлар билан таниша олмайди.
Изоҳ (0)