Koronavirus alomatlarini 3 kun oldin aniqlaydigan “aqlli” uzuk yaratildi

Oura kompaniyasi Health uzugi uchun insonda koronavirusning tashqi alomatlarini uch kun oldin aniqlashga qodir dastur yaratdi, deb xabar beradi Engadget.

Dastur 90 foiz aniqlikda ishlaydi. Uzuk egasi har kuni ertalab kichik so‘rovnomada ishtirok etadi, olingan ma’lumotlar sun’iy intellekt algoritmlari yordamida qayta ishlanadi. Shuningdek, aqlli uzuk o‘z egasining biologik ko‘rsatkichlarini monitoring qiladi — tana haroratini o‘lchaydi, uyqu rejimini, shuningdek, jismoniy faollik va yurak ritmi darajalarini kuzatadi.

“Xolistik va integratsiyalashgan neyrobiologik platforma inson organizmini muntazam kuzatadi, bu esa COVID-19’ning belgilari paydo bo‘lishini oldindan aniqlash imkonini beradi. Fikrimizcha, mazkur platforma tibbiyot xodimlarimiz, tez yordam shifokorlari va COVID-19 davrida yashayotgan fuqarolarning muhim himoya vositasiga aylanadi”, — deydi loyiha muallifi Ali Rizoiy.

Ayni vaqtida mazkur tizim 600 dan ortiq tibbiyot xodimi ishtirokida sinovdan o‘tkazilmoqda.