Boston Dynamics’нинг робот-ити 74,5 минг доллардан сотувга чиқди

Американинг Boston Dynamics компанияси томонидан ишлаб чиқарилувчи Spot роботи сотувга чиқди. Бу ҳақда компания сайти орқали хабар берилди.

Ишлаб чиқарувчининг маълум қилишича, робот-ит мобил роботлар соҳасига қизиқувчи дастурчиларга мўлжалланган. Хусусан, саноат назорати ва кўнгилхушлик йўналишига.

Spot роботининг нархи 74,5 минг долларни ташкил этмоқда. Роботни фақатгина АҚШ ҳудудида харид қилиш мумкин, бошқа давлатлардаги мижозларга робот ижарага берилади холос. Boston Dynamics роботи буюртма қилинганидан 6-8 ҳафта ўтиб етказиб берилади.

Компаниянинг таъкидлашича, Spot «қутидан чиқиши билан» ишга тайёр бўлади, роботнинг мослашувчан интерфейси уни турли дастурларга тўғирлаш имконини беради. YouTube’даги Boston Dynamics каналига Spot’нинг имкониятлари реклама қилинган ролик жойлаштирилган.

Тўрт оёқли роботга берилган изоҳга кўра, у зиналар бўйлаб чиқиши, белгиланган ҳудудни кесиб ўтиши ва бино ичида кичикроқ ўлчамга эга бўла олиши мумкинлиги ёзилган. Шунингдек, Spot хавфли ёки мураккаб ҳудудлардаги объектларни кўздан кечириши, сайтдан маълумотларни автоматлаштирилган ҳолда йиғиши, ҳали тадқиқ этилмаган ҳудудларга юкларни ташиши мумкин.

Аввалроқ Boston Dynamics роботи чўпонлик ҳам қила олиши мумкинлиги тўғрисида хабар берилганди.