Бухоро вилоятида ҳамқишлоғининг мотоциклини ўғирлаб, транспорт воситасини бўлакларга бўлиб сотишни мақсад қилган фуқарога нисбатан жиноят иши қўзғатилди. Бу ҳақда «Дарё»га Бухоро вилоят ИИБ ахборот хизмати хабар берди.
Маълумот берилишича, 2020 йилнинг 9 июнь куни соат 01:30 да Қоракўл туманидаги «Эски қалъа» МФЙ фуқароси М.Ф. маст ҳолда Хўжалар кўчасида юрганда, савдо дўкони ёнида турган ҳамқишлоғи Б.О.га тегишли қизил рангли мотоциклни кўриб қолади. Кўчада ҳеч ким йўқлигидан фойдаланган фуқаро транспорт воситасини судраб олиб қочган ва ўзининг яшаш ҳовлисига яшириб қўйган.
Шофиркон туман ИИБ ходимлари томонидан олиб борилган тезкор қидирув-суриштирув ҳаракатлари натижасида мотоцикл фуқаро М.Ф. томонидан ўғирлангани аниқланган.
«Фуқаро транспорт воситасини ўғирлангани фош бўлмаслиги ва ундан моддий даромад топиш мақсадида мотоциклни эҳтиёт қисмларга ажратган. Ва бўёқларини қириб, ўчириб ташлаган», — дейди вилоят ИИБ ахборот хизмати раҳбари Қувват Ярашов.
Ҳолат юзасидан М.Ф.га нисбатан Жиноят кодексининг 267-моддаси (Транспорт воситасини олиб қочиш) 2-қисми «г» бандига асосан жиноят иши қўзғатилган.
Эслатиб ўтамиз, ушбу модда билан айбланган фуқаронинг айби исботланса, ўн йилдан ўн беш йилгача озодликдан маҳрум қилиниши белгиланган.
Изоҳ (0)