Бухоро вилоятининг Ғиждувон тумани коронавирус хавфи сабаб «қизил» ҳудудга киритилган бўлишига қарамасдан, уйида қиморхона ташкил қилган фуқаролар борлиги маълум бўлди. Бу ҳақда «Дарё»га вилоят ИИБ ахборот хизмати хабар берди.
Таъкидланишича, карантин даврида Ғиждувон туман ИИО ФМБ ходимлари томонидан тезкор профилактика тадбири ўтказилган. Тадбирда туманнинг «Дегрезон» маҳалласида яшовчи, 28 ёшли фуқаро Р.М. ўз ҳовлисида бир нечта фуқароларни йиғиб, таваккалчиликка асосланган қимор (карта) ўйинини ташкил қилгани аниқланган.
Бу ҳам етмагандек, фуқаро қишлоқдошларига меҳмонхонасидан жой ҳам ажратиб, қимор ўйини учун шарт-шароит яратиб берган.
Мазкур ҳолат юзасидан Р.М.га нисбатан Жиноят кодексининг 278-моддаси (Қимор ва таваккалчиликка асосланган бошқа ўйинларни ташкил этиш ҳамда ўтказиш) 1-қисми билан жиноят иши қўзғатилган. Ҳозирда тергов-суриштирув жараёнлари олиб борилмоқда.
Изоҳ (0)